Aðdáendur Star Trek víða um lönd fagna nú mjög nýjum og að því er virðist, í það minnsta til að byrja með, vel heppnuðum sjónvarpsþáttum um hinn dáða Jean-Luc Picard sem er, þegar hér er komið við sögu, sestur í helgan stein en lifir vitaskuld enn á fornri frægð sem farsæll kafteinn hins rómaða geimskips Enterprise.

Trekkarar á Íslandi eru hér engin undantekning og nokkur úr þeirra harðasta og innsta kjarna hafa sameinast um að leigja sal í Bíó Paradís til þess að njóta þess að upplifa fyrstu þrjá þættina saman á föstudagskvöld.

„Viðbrögðin eru ótrúlega jákvæð en þetta byrjaði bara þannig að við vorum, svolítið harður kunningjahópur í þessu, að ræða hvort það væri ekki gaman ef við myndum hittast og horfa á þetta,“ segir Haukur Guðmundsson sem endaði með að þurfa að finna þessum góðra Trekkara-fundi pláss í bíósal.

Samþykki Stjörnuflotans

„Þetta vatt einhvern veginn bara alltaf meira og meira upp á sig þangað til við ákváðum bara að heyra í Bíó Paradís og athuga hvort það væri hægt að leigja sal,“ segir Haukur og leggur áherslu á að með því að ganga frá öllum formsatriðum og tilskildum leyfum frá þeim sem um höfundaréttarmál Star Trek sjá hafi verið auðsótt mál að fá leigðan sal í Paradísarbíóinu við Hverfisgötuna.

Ástríðutrekkarinn Haukur Guðmundsson ásamt áhöfninni á Deep Space Nine sem laðaði hann að Star Trek.

„Við höfðum samband út og þetta er þannig að það má alveg halda einkapartí, svokölluð „viewing party“, svo lengi sem fólkið sem heldur þau græðir ekki á þeim og þetta er ekki í nafni einhvers fyrirtækis eða stofnunar og fólkið sem horfir á sé með áskrift að viðeigandi streymisveitu. Þannig að í þessu tilfelli eru bara allir velkomnir sem vinir og kunningjar í „áhorfsveisluna“ og við deilum bara kostnaðinum á salnum þannig að því fleiri sem koma, þeim mun ódýrara verður þetta fyrir hvern og einn.“

Eins og góð messa

Hópglápið á fyrstu þrjá Picard-þættina hefst klukkan 22 á föstudagskvöld í Bíó Paradís og Hauki telst til að skömmu eftir að hann stofnaði Facebook-viðburð um uppákomuna hafi eitthvað í kringum 50 manns verið búnir að boða komu sína.

„Við vorum komin með um 30 manns á lista af fólki í kringum okkur, eftir að við vorum búin að tala okkur saman og miðað við viðbrögðin og hversu margir eru að bregðast við er ljóst að Star Trek er alveg góð hópupplifun. Það er einhvern veginn bara eitthvað við þetta þannig að þetta er eins og að fara í góða messu.“

Frjálst klæðaval

Þótt áköfustu geimnördarnir skipi sér oft í andstæðar fylkingar þeirra sem hafa gert Star Wars að merkingarmiðju tilveru sinnar og þeirra sem lifa og hrærast í Star Trek-veröldinni eiga báðir hópar þó sameiginlega ríka tilhneigingu og þörf fyrir að klæða sig upp sem persónur þessara menningarfyrirbæra.

Patrick Stewart sló til vegna samtímaádeilunnar í Picard-þáttunum.

„Það hefur enginn talað um það þannig séð en ég yrði mjög hissa ef enginn myndi mæta í búningi,“ segir Haukur aðspurður hvort reikna megi með fullum sal af uppáklæddum trekkurum. „Ég hef ekkert pælt í því sjálfur en það getur vel verið að ég mæti í einhverju og maður á alveg nóg að velja úr einhverjum búningum sem hanga uppi í fataskáp.“

Samfélagsrýnirinn Picard

Haukur dróst ungur inn í Star Trek heiminn þegar hann byrjaði fyrir tilviljun að fylgjast með Star Trek: Deep Space Nine-þáttunum, sem hófu göngu sína 1993, þegar þeir voru sýndir í íslensku sjónvarpi.

„Mér finnst þessir þættir fara skemmtilega af stað,“ segir hann þegar hann er spurður út í nýju Picard-þættina. „Þeir eru mjög ólíkir Discovery, sem eru búnir að vera í tvö ár, og fara miklu rólegar af stað enda lagt upp með þá stefnu að hafa þættina ólíka.“

Þá bendir Haukur á að leikarinn Patrick Stewart hafi ekki ætlað sér að leika Picard framar en þegar hann sá hvernig tekist er á við samtímann í þáttunum hafi honum snúist hugur. „Maður sér strax í fyrsta þætti mikla ádeilu á ýmsa fordóma og aðskilnaðar- og einangrunarstefnu sem verður greinilega þemað í þessum þáttum.“