Inga Birna er fatahönnuður að mennt og segist alla tíð hafa verið að vinna að einhvers konar list þó að hún hafi ekki verið í tónlist mjög lengi.

„Ætli fatahönnun og tónlist skarist ekki þar sem ímyndarsköpun listamannsins á í hlut. Fyrir mér er þetta spurning um að mála myndina mína alla. Upphaflega laðast ég að fatahönnun í framhaldsskóla vegna þess að hún er áþreifanleg og þrívíð. Ég elska að vinna í höndunum og vil helst fara tilraunakenndar leiðir og dansa á línunni þegar kemur að sköpunargleði versus klæðileika. Ég lærði einnig förðun í Airbrush&MakeUp School árið 2009 bara vegna þess að þar var verið að vinna með bodypaint og fantasíuförðun. Ég hef í rauninni í langan tíma ekki botnað almennilega í sjálfri mér vegna þess að ég hef flakkað á milli listgreina og forðast það eins og heitan eldinn að viðurkenna fyrir mér að ég sé mögulega bara listamaður og hér í þessari tilveru til að vera forvitin og skapa þennan heim sem býr í hausnum á mér.

Inga Birna segir fatahönnunina tengjast tónlistinni. Að hanna föt og semja tónlist snýst um að mála alla myndina sína að sögn hennar. FRÉTTABLAÐIÐ/STEFÁN

Inga Birna byrjaði í söngnámi árið 2016 og kláraði svo námskeið í lagasmíðum hjá Complete Vocal Studio á Íslandi árið 2018.

„Í kjölfarið kynntist ég Stebba og fór á flug með honum,“ segir Inga Birna.

Stebbi er Stefán Örn Gunnlaugsson pródúsent, en hann hefur verið að vinna með Ingu Birnu að plötunni.

„Ég sem megnið af lögunum og textunum á plötunni en hann leggur til allt undirspil og lögin verða því alltaf að skemmtilegu samvinnuverkefni. Hann útsetur lögin en ég sit með honum í stúdíóinu og útset með honum svo við erum mikið að vinna þetta saman,“ útskýrir Inga Birna.

„Ég var að gefa út fjórða lagið á plötunni minni núna um daginn en það heitir Game. Lagið er hresst aggressíft popp undir áhrifum frá hipphoppi. Þar erum við Stefán Örn að leika okkur með nokkrar stefnur.“

Platan Hypnopompic er væntanleg þann 23. apríl en hægt er að hlusta á þau lög sem þegar eru komin út á Spotify og YouTube.

„Þessi plata sem er að koma út er í rauninni algjör grautur. Ég er ekki beint að fylgja neinni stefnu annarri en hugmyndaflugsins míns. Ég vinn hvert lag út frá laginu sjálfu en ekki út frá þeirri stefnu sem ég vil halda mig við. Þetta er í raun algjör frumraun og tilraun til að átta mig á því hvernig listamaður ég er. En ég myndi flokka þetta sem tilraunakennt popp eða art popp,“ segir Inga Birna.

Tónlistin er vettvangur fyrir Blankiflur til að stíga fram. MYND/ZOE RUTH ERWIN

Blankiflur upp á yfirborðið

Inga Birna semur tónlistina undir listamannsnafninu Blankiflur. Hún segir að með Blankiflur sé hún í raun að blanda saman sínum listræna heimi undir einn hatt sem gengur undir þessu nafni.

„Með tónlistinni kom vettvangur fyrir mig til að stíga fram sem þessi vera innan gæsalappa, Blankiflur, sem hefur aldrei fengið almennilega að komast upp á yfirborðið vegna þess að ég hef einfaldlega verið hrædd um hvernig henni yrði tekið. Ég hef ósjaldan mætt viðmótinu „þú ert skrítin“ og ég var lítil í mér vegna þess alveg þar til ég fór að melta þá tilfinningu með músíkinni minni þegar ég byrjaði að semja 2018. Þá fór ég að skilja heiminn minn betur og ég sé lög og tóna í litum sem kemur svolítið heim og saman við þessa þörf að fá að mála myndina alla. Í dag fagna ég orðinu skrítin og öðruvísi, því þegar ég horfi til baka hef ég alltaf leitast eftir því að finna nýja hugmynd en ekki elta þær sem eru nú þegar til staðar. Ég myndi segja að hönnun mín endi yfirleitt mun tengdari búningahönnun en tísku, því kemur sér vel að hinn vinkillinn á minni sköpun felist að miklu leyti í því að standa á sviði og tjá mig í gegnum tónlist. Blankiflur er fatahönnun, tónlist og myndbönd. Hún er einhvers konar sjónrænn og hljóðrænn heimur. Mig langar svo mikið að vinna með þetta stóra sem býr inni í mér og það er fínt að það sé Blankiflur sem gerir það. En svo er ég líka bara Inga Birna. Það er gott að klæða þetta í þannig búning,“ útskýrir hún.

Inga Birna Friðjónsdóttir hefur prófað sig áfram með ýmis listform sem hún getur sameinað með verunni Blankiflur. MYND/BIRTA RÁN BJÖRGVINSDÓTTIR

Fáum öll ljótar tilfinningar

Inga Birna segist koma að öllum hliðum sköpunarinnar á nýju plötunni.

„Ég hef ekki verið að hanna eða sauma mikið undanfarið en það stendur til. Þegar við tónlistarfólkið fáum að koma fram þá stendur til að setja upp þennan heim hennar Blankiflur og skapa útlitið líka. Það er að sjálfsögðu markmiðið að halda útgáfutónleika en það er óljóst út af COVID. En ég er mjög spennt fyrir því að fá að byrja að koma fram,“ segir hún.

Þessa dagana vinnur Inga Birna að gerð tveggja myndbanda við lögin sín í samstarfi við tvo stráka sem starfa í kvikmyndagerð.

„Ég get í raun ekki lýst myndböndunum enda eru þau bara í vinnslu og ég er að gera mér grein fyrir möguleikunum sem felst í myndbandagerð. Ég er bara að skapa það sem er í hausnum á mér. Það verður bara að horfa á þau og sjá,“ útskýrir Inga Birna.

„Platan sjálf er viss úrvinnsla á árunum á milli tvítugs og þrítugs. Ég var komin á stað þar sem ég þurfti að gera upp marga hluti eins og sambönd og spyrja sjálfa mig spurninga sem hafa legið á mér. Ég myndi segja að inngangurinn inn í öll lögin sé einhvers konar tilfinning á mismunandi stað á tilfinningarófinu.

Nýjasta lagið er í raun byggt á pirringi og reiði. Mér finnst mikilvægt sem manneskja að kanna allt litróf tilfinninganna. Þú ert kannski með ljóta tilfinningu og vilt forðast hana, en málið er að við fáum öll þessar ljótu tilfinningar. Ef við lærum ekki á þær, ef við náum ekki að bera kennsl á þær, þá getum við aldrei unnið með þær. Þannig að þetta nýjasta lag, Game, það er lag sem fjallar um ekki neitt sérstaklega fallegar tilfinningar. Þess vegna ákvað ég að taka þær og tífalda þær og setja inn í lag til þess að geta auðveldar borið kennsl á þessa tilfinningu þegar hún kemur upp í mér. Mögulega getur lagið gert það sama fyrir aðra, þá vil ég auðvitað í kjölfarið hvetja fólk til að skoða sjálft sig en ekki fara að ana út í einhverja reiði gagnvart öðrum, þó þetta lag sé kannski samið um það. Óhamingjan byrjar og endar hjá okkur sjálfum. Það er svolítið þetta uppgjör og sjálfskoðun sem ég er að vinna með á þessari plötu ásamt því að vinna með stórar og dýnamískar pælingar í útsetningum.“

Lagið Game er nýlega komið á Spot­ify og YouTube. MYND/AÐSEND