Atoboy byggir á hefðum kóreskrar matargerðar og notar New York-borg sem innblástur og leiksvið.

Matreiðslumenn Atoboy hafa sett saman einstakan fimm rétta matseðil, þar sem íslenskt hráefni mætir kóreskum New York-stíl. Hægt verður að skella sér í vínpörun með seðlinum til að gera upplifunina enn ánægjulegri.

„Við erum mjög spennt að geta loksins verið með viðburð þar sem við fáum til okkar matreiðslumeistara frá virtum stöðum úti í heimi til að koma til Íslands. Þeir Mark Nobello og Jon Cabral eru metnaðarfullir matreiðslumeistarar sem hafa mikla ástríðu fyrir matargerð, en þeir hafa starfað undir handleiðslu eiganda Atoboy og Atomix, sem er tveggja stjörnu Michelin-veitingastaður sem er á lista yfir 50 bestu veitingastaði heims. Atoboy hefur verið Michelin Bib Gourmand síðan 2017 og er nú með Michelin-plötu viðurkenningu.

Landsliðskokkar Héðins eru spenntir að taka á móti þeim Mark og Jon, vinna með þeim þessa dagana og læra eitthvað nýtt,“ segir Elías Guðmundsson, annar eigandi staðarins.

Gaman að skapa ný tengsl

Karl Viggó Vigfússon, meðeigandi Elíasar, segir alltaf gaman að skapa ný tengsl á milli staða.

„Við hvetjum öll sem hafa áhuga á kóreskri matargerð, og bara góðum mat, að kíkja til okkar þessa tvo daga. Þetta verður mjög spennandi, það verður plötusnúður á fimmtudaginn og við höfum sett saman vínpörun sem gefur upplifuninni enn meira bragð. Þá verður einnig hægt að skella sér í frískandi kokteila. Eldamennskan fer nánast öll fram yfir grillinu okkar sem er úti í sal svo það verður smá sýning úr þessu, lifandi og opið eldhús”, segir Karl Viggó, afar spenntur að fá matreiðslumeistarana í heimsókn.

Vert er að geta þess að Atoboy hefur fengið frábæra umfjöllun frá því þeir opnuðu árið 2016 og hefur meðal annars verið fjallað um staðinn í NY Times, Michelin Guide og OAD (Opinionated About Dining).

Með ástríðu fyrir matargerð

Matreiðslumeistararnir Mark Nobello og Jon Cabral eru báðir yfir sig spenntir að koma hingað til lands og fá að spreyta sig í eldhúsinu á Héðni Kitchen & Bar. Mark er fæddur og uppalinn í Queens, New York, en áhugi hans fyrir því að hasla sér völl í matreiðslu var innblásinn af foreldrum hans og hæfileikum þeirra til að búa til töfrandi máltíðir úr einföldu hráefni en einnig að nota mat sem lækningu og matargerð sem helgisið.

Þessa stundina hefur Mark áhuga á mismunandi aðferðum til að varðveita mat, til dæmis gerjun. Matarbúr Atoboy er stórt og fjölbreytt og sum gerjuðu hráefnin eru yfir tveggja ára gömul.

„Gerjun gerir manni kleift að nýta skammvinnt hráefni í miklu lengri tíma. Það er áskorun fyrir mig að upphugsa nokkrar árstíðir fram í tímann fyrir þróun matseðils. Þessa dagana vinn ég að því að fara yfir gjöfula uppskeru síðsumarsins og hvernig best er að varðveita og geyma tómata, kúmquats, steinabláber (e. huckleberry) og sumarpipar,“ segir Mark, sem hefur mikla ástríðu fyrir matargerð.

Uppáhaldsréttir Marks eru meðal annars hefðbundinn Kare Kare, sem er filippseyskur nauta- og hnetupottréttur, kóresk svínasíða með ssamjang og hrísgrjónum, og sakbitna sælan er kóreskar Shin-skyndinúðlur með salti og edik-flögum.

Mark grunaði ekki að leið hans gæti legið til Íslands.

„Mér datt aldrei í hug að ég gæti ferðast til Íslands og í rauninni að elda á Íslandi, ef út í það er farið. Sem fæddur og uppalinn New York-búi hef ég ekki haft mörg tækifæri til að fara til útlanda og segja sögur mínar með mat. Ég er þakklátur fyrir þessa reynslu og fyrir tækifærið að vera fulltrúi Atoboy erlendis, á meðan ég læri meira um menningu og sögu íslenskrar matargerðar með teyminu hjá Héðni Kitchen & Bar,“ segir Mark fullur tilhlökkunar.

Uppalinn á veitingastað

Kokkurinn Jon er fæddur og uppalinn í Guam þar sem foreldrar hans áttu lítinn filippseyskan veitingastað.

„Æskuminningar minnar eru uppfullar af því að eyða dögunum á veitingastaðnum og horfa á móður mína elda mismunandi rétti frá hinum fjölbreyttu svæðum Filippseyja,“ segir Jon dreyminn á svip.

Það var á þessum fyrstu árum sem hann vildi prófa að starfa við matreiðslu, sem svo leiddi til þess að hann skráði sig í Culinary Institute of America í Hyde Park, New York. Jon vonar að geta einn daginn deilt filippseyskum mat með umheiminum alveg eins og móðir hans gerði, en með fágaðari sjónarhorni, en hún er hans mesti innblástur.

„Fyrir utan matreiðslu í eldhúsinu hef ég einnig mikinn áhuga á því sem fer fram í matsalnum og fylgist með list gestrisninnar í flæði þjónustu og samskipta við gesti.“

Uppáhaldseldunaraðferð Jons í matreiðslu er að nota kolagrill, sem á stóran þátt í ást Guam og Hawaii á grilluðum mat. Sambland af ólíkum þáttum sem grillið gefur matnum, svo sem reyk, áferð og stökkar brúnir, sem er einmitt það sem hár hiti viðarkola myndar og gerir grillmatinn ómótstæðilegan.

„Það er mér heiður að fá tækifæri til að taka þátt í samstarfi Héðins og Atoboy. Ég er ekki bara spenntur að heimsækja Ísland í fyrsta skipti, heldur líka að læra meira um menninguna, matinn og hráefnin sem landið hefur upp á að bjóða. Ég hef alltaf notið útivistar og metið náttúruna og Ísland virðist vera fullkominn staður til að njóta þess,“ segir Jon, sem er orðinn afar spenntur fyrir Íslandsförinni.