Tónlistarverðlaunagripunum sem kenndir eru við Grammy var útdeilt á glæsilegu þorrablóði ríka, fína og fræga fólksins í Los Angeles aðfararnótt mánudags.

Sjá einnig
Stór­tíðindi á Gram­my-há­tíðinni í nótt

Ice-T og Coco mættu sprúðlandi hress til veislunnar þar sem Adele fann klettinn sinn, Beyoncé brilleraði og flest þau sem vettlingi geta valdið og á míkrafóni haldið létu ljós sitt skína í sínu fínasta eða furðulegasta pússi. Vart var því þverfótað fyrir senuþjófum og ljósmyndarar heimspressunnar máttu hafa sig alla við þegar þeir smelltu af myndum í þúsundatali.

Sjitt, hvað mér leiðist hérna! Ben Affleck er eins og fiskur í vatni á Óskarsverðlaununum en tónlistarmegin í tilveru Jennifer Lopez er hann meira eins og þorskur á þurru landi.
Fréttablaðið/Getty

Hér gefur því aðeins að líta örlítið sýnishorn frá kvöldinu sem fór ákaflega vel fram enda Will Smith, sem betur fer, fjarri góðu gamni og því fékk enginn á lúðurinn en lúðrum var útdeilt af einurð og festu til þeirra sem teljast mega fremst meðal jafningja á hinum ýmsu tónlistarsviðum.

Lizzo kann listina að vekja jákvæða athygli og toppaði sig í einhverju frá Dolce&Gabbana sem huldi kjól sem hlýtur að mega teljast einn sá glæsilegasti á þessu þorragiggi.
Fréttablaðið/Getty
Harry Styles lét EgonLab klæða sig og óð beint í skotlínu kynnisins Trevor Noah sem sagði hann sérlega fínan í kvennaríum þótt hann væri í einhvers konar tilbrigði við smekkbuxur.
Fréttablaðið/Getty
Ef ég sé með hattinn! Shania Twain lét aðra tískusenuþjófa ekki eiga neitt inni hjá sér og varpaði skugga sínum á þau með rauðu hári og speisaðri drakt frá Harris Reed. Með hatt í stíl.
Fréttablaðið/Getty
Hin mjög svo sigursæla Taylor Swift var elegant að vanda og fangaði athygli viðstaddra með notalegri nærveru og nokkuð klassískum sundurslitnum kjól frá Roberto Cavalli.
Fréttablaðið/Getty
Megan Fox og Machine Gun Kelly voru ansi hreint svöl. Hún þó mun betur áttuð en vélbyssukjafturinn sem var ekki alveg með hugann við stund og stað.
Fréttablaðið/Getty
The Rock var hrókur alls fagnaðar en tókst tæplega að lyfta brún Bens Affleck sem fylgdi sinni heittelskuðu J. Lo til gleðinnar en virtist helst vilja vera einhvers allt annars staðar.
Fréttablaðið/Getty
Að öllum hinum ólöstuðum skein stjarna Beyoncé skærast. Hún hirti fjóra lúðra og er komin með 32 styttur í hús og þar með sigursælasti tónlistarmaðurinn í sögu Grammy.
Fréttablaðið/Getty
Doja Cat stóð undir væntingum og sló um sig í Atelier Versace eftir að hafa látið heldur betur að sér kveða á Tískuvikunni í París á dögunum.
Fréttablaðið/Getty
Adele fékk ekki aðeins lúður heldur rættist draumur hennar um að fá að hitta Dwayne Johnson, sjálfan Klettinn, þegar hann læddist aftan að henni á sannkölluðu Kodak-augnabliki.
Fréttablaðið/Getty