Cardi B hefur sjaldan ef nokkurn tímann sést í eins glæsilegum klæðnaði og á verðlaunaafhendingu American Music Awards síðasta sunnudag. Þetta var í fyrsta sinn sem hún er kynnir hátíðarinnar og hún nýtti tækifærið til að spóka sig í mörgum ólíkum samsetningum frá hátískuhúsum eins og Schiaparelli, Jean Paul Gaultier, Alexandre Vauthier og fleirum, með dyggri aðstoð frá stílistanum sínum, Kollin Carter. Tískumiðillinn Women's Wear Daily fór yfir klæðnaðinn og gaf innsýn í hönnunina.

Átta „lúkk“ á einu kvöldi

Cardi B byrjaði kvöldið í klæðnaði sem gleymist seint. Hún mætti á rauða dregilinn í sérhönnuðum svörtum Schiaparelli-kjól með svart slör og svarta hanska með gullnöglum. Svo var hún með gullgrímu fyrir öllu andlitinu.

Rapparinn vakti mikla athygli með þessu sérstaka útliti frá Schiaparelli.

Cardi skipti síðan í dramatískan klæðnað fyrir byrjun sýningarinnar og mætti á svið í svörtum flauelskjól með háu hálsmáli sem var klofinn upp að læri og var með fjaðraðan höfuðbúnað úr haustsafni Alexandre Vauthier fyrir árið 2021.

Þegar Cardi B fór fyrst upp á svið var hún í þessum dramatíska klæðnaði.

Síðan kom hún aftur á svið í svörtum jakkalegum flauelskjól með glitrandi axlir og sat ofan á nokkrum Loius Vuitton ferðatöskum.

Cardi B virkaði afslöppuð þegar hún sat ofan á Louis Vuitton töskunum.

Cardi fór ekki bara upp á svið til að kynna, heldur vann hún líka verðlaunin fyrir besta hipphopp-lagið fyrir smellinn Up. Hún kom á svið til að taka við verðlaununum í kanarígulum kjól með úfið skraut eftir Jean Paul Gaultier úr haustsafninu frá 2019.

Cardi B tók við verðlaununum sínum í þessum gula kjól sem er með skrauti frá Jean Paul Gaultier. FRÉTTABLAÐIÐ/GETTY

Því næst kom Cardi B fram í fjólubláum kjól með kristalskreytingum á búknum, en á öxlunum var hún með stórar fjólubláar fjaðrir úr safni Jean-Louis Sabaji fyrir haustið 2021. Eftir það fór hún í korsettlegan topp við svart pils og var með stórt svart skraut sem líktist blævæng á höfðinu.

Eftir að hún var búin að taka við verðlaunum sínum kom hún fram í þessum fjólubláa kjól.

Rapparinn fór svo aftur í föt frá Schiaparelli til að klára verðlaunaafhendinguna og kom fram í víðum jakka með alls kyns gullskrauti. Að lokum spókaði hún sig á rauða dreglinum með verðlaunin sín í hvítum kjól með hvíta hettu sem var skreytt gimsteinum og kom úr safni Miss Sohee fyrir haustið 2021.

Tískuspekingar voru sammála um að Cardi B hafi verið sérlega glæsileg á sunnudagskvöld.