Tilnefningar til Fjöruverðlaunanna voru kynntar á Borgarbókasafninu í Grófinni fyrr í dagog voru níu bækur tilnefndar í þremur flokkum. Fjöruverðlaunin eru bókmenntaverðlaun kvenna og trans, kynsegin og intersex fólks á Íslandi.
Eftirfarandi höfundar og bækur eru tilnefndar:
- Ótemjur eftir Kristínu Helgu Gunnarsdóttur.
- Reykjavík barnanna eftir Margréti Tryggvadóttur og Lindu Ólafsdóttur.
- Akam, ég og Annika eftir Þórunni Rakel Gylfadóttur.
- Kristín Þorkelsdóttir eftir Bryndísi Björgvinsdóttur og Birnu Geirfinnsdóttur.
- Kvár, hvað er að vera kynsegin? eftir Elísabetu Rún.
- Sigurður Þórarinsson: Mynd af manni eftir Sigrúnu Helgadóttur.
- Merking eftir Fríðu Ísberg.
- Dyngja eftir Sigrúnu Pálsdóttur.
- Tanntaka eftir Þórdísi Helgadóttur.
Tvær af þremur tilnefndar til Íslensku bókmenntaverðlaunanna
Í flokki barna- og unglingabókmennta voru þrjár bækur tilnefndar. Ótemjur eftir Kristínu Helgu Gunnarsdóttur var meðal þeirra en í rökstuðningi dómnefndar er höfundur sagður skapa „spennandi sögu með skemmtilegum persónum sem á brýnt erindi við lesendur.“
Reykjavík barnanna eftir Margréti Tryggvadóttur og Lindu Ólafsdóttur var einnig tilnefnd og segir dómnefnd höfunda „draga fram fjölbreyttan fróðleik og gera skil á skemmtilegan hátt í góðu jafnvægi texta og mynda.“
Þá var bókin Akam, ég og Annika eftir Þórunni Rakel Gylfadóttur tilnefnd og í rökstuðningi dómnefndar segir meðal annars: „Frásögnin er margþætt og allir endar eru leiddir saman í lokin. Þetta er fyndin, krefjandi og spennandi saga sem á erindi við ungmenni.“ Síðari tvær bækurnar voru einnig tilnefndar til Íslensku bókmenntaverðlaunanna í gær.
Í dómnefnd barna- og unglingabókmennta sátu Anna Þorbjörg Ingólfsdóttir, lektor í íslensku, Brynja Helgu Baldursdóttir, íslenskufræðingur og Hildur Ýr Ísberg, íslensku- og bókmenntafræðingur.
Myndasaga, hönnunarbók og ævisaga
Í flokki fræðibóka og rita almenns eðlis voru eftirfarandi bækur tilnefndar. Kristín Þorkelsdóttir eftir Bryndísi Björgvinsdóttur og Birnu Geirfinnsdóttur sem fjallar um einn þekktasta hönnuð Íslendinga. „Bókin er einstaklega fögur og vel hönnuð, allt frá uppsetningu mynda og texta til efnislegrar uppbyggingar. Hér er fjallað um lífshlaup og arfleifð eins okkar afkastamestu listamanna með miklum sóma,“ segir í rökstuðningi dómnefndar.
Myndasagan Kvár, hvað er að vera kynsegin? eftir Elísabetu Rún var einnig tilnefnd en í umsögn dómnefndar segir meðal annars: „Nýyrðið kvár er nafnorð í hvorugkyni og merkir ókyngreind manneskja. Bókinni, sem er sett upp í teiknimyndaform, tekst einstaklega vel að fræða lesendur um kvár og um leið um fjölbreytileikann sem býr undir regnboganum.“
Þá er bókin Sigurður Þórarinsson: Mynd af manni eftir Sigrúnu Helgadóttur tilnefnd en hún fjallar um ævi og störf eins merkasta vísindamanns Íslands á 20. öld. Bókin er einnig tilnefnd til Íslensku bókmenntaverðlaunanna.
„Höfundur fer með lesandann í heillandi ferðalag upp á jökla, í gegnum öskulög og inn í kvikuhólf í fylgd með vísindamanninum, söngvaskáldinu og náttúruverndarsinnanum Sigurði. Bókina prýðir aragrúi mynda sem glæða frásögnina lífi og dýpka skilning á efninu,“ segir í rökstuðningi dómnefndar.
Í dómnefnd fræðibóka og rita almenns eðlis sátu Hafdís Erla Hafsteinsdóttir, sagnfræðingur, Sigrún Birna Björnsdóttir, framhaldsskólakennari og Sigrún Helga Lund, tölfræðingur.
Tvær skáldsögur og ljóðabók
Í flokki fagurbókmennta voru einnig þrjár bækur tilnefndar. Merking, fyrsta skáldsaga Fríðu Ísberg, sem er vísindaskáldsaga sem er sögð „kallast skýrt á við íslenskan samtíma“. Í rökstuðningi dómnefndar er sagan sögð „frumleg og stíllinn nýskapandi og notkun tungumálsins einkar úthugsuð og áhrifarík og styður við heildstæða persónusköpun verksins.“
Tanntaka, fyrsta ljóðabók Þórdísar Helgadóttur, var einnig tilnefnd. Í rökstuðningi dómnefndar segir meðal annars: „Þessi ljóðabók á erindi við samtímann af því að málefnin sem hún snertir hljóta að verða lesanda hugleikin. Þau ber að lesa oft því ný sýn fylgir hverjum lestri.“
Fríða Ísberg og Þórdís Helgadóttir eru báðar meðlimir í kollektífinu Svikaskáldum en þær hlutu tilnefningar til Íslensku bókmenntaverðlaunanna fyrir skáldsögu sína Olíu.
Að lokum er skáldsagan Dyngja eftir Sigrúnu Pálsdóttur tilnefnd en hún segir frá bóndadóttur sem fædd er um miðbik 20. aldar og er gædd óvenjulegri stærðfræðigáfu. Dómnefnd segir meðal annars: „Dyngja er lágmælt saga með magnaðan undirtexta sem höfðar sterkt til réttlætiskenndar lesenda.“
Í dómnefnd fagurbókmennta sátu Dagný Kristjánsdóttir, bókmenntafræðingur, Elín Björk Jóhannsdóttir, bókmenntafræðingur og Júlía Margrét Sveinsdóttir, bókmenntafræðingur.
