Heiða Rún Sigurðardóttir, oftar þekkt sem Heida Reed, hefur verið tilnefnd sem besta leikkonan á C21's International Drama Awards fyrir túlkun sína á Stellu Blómkvist í samnefndum sjónvarpsþáttum framleiddum af Sagafilm sem sýndir voru í Sjónvarpi Símans. Þetta kemur fram í tilkynningu frá Sagafilm.

Auk Heiðu hlutu tilnefningu Claire Foy, sem lék drottninguna í The Crown, Amy Adams fyrir Sharp Objects, Jodie Comer og Sandra Oh fyrir leik sinn í Killing Eve og Laura Linney fyrir Ozark.

Heiða Rún hefur getið sér gott orð á leiklistarsviðinu en hún lék meðal annars í Poldark sem sýndir hafa verið á RÚV á síðustu árum. 

Verðlaunin verða veitt við hátíðlega athöfn á St. Pancras Renaissance hótelinu sem hluti af C21's Conent London ráðstefnunni þann 28. nóvember næstkomandi.