Aðdáendur YouTube-stjörnu, sem gekk undir nafninu Technoblade, syrgja nú þennan vinsæla tölvuleikjaspilara.
Technoblade, sem hét réttu nafni Alexander, lést í vikunni eftir snarpa baráttu við krabbamein sem hann greindist með fyrir tæpu ári síðan. Hann var með tæplega ellefu milljónir fylgjenda á YouTube og spilaði einkum hinn vinsæla tölvuleik Minecraft.
Faðir Alexanders, sem var 23 ára þegar hann lést, kom fram í myndbandi þar sem andlát hans var staðfest.
Nokkrar vikur eru síðan ljóst var í hvað stefndi og var Alexander búinn að taka upp myndband þar sem hann þakkaði fylgjendum sínum samfylgdina í gegnum árin. Sagði hann að síðustu ár hans hefðu verið þau bestu í hans lífi.
„Hann var besti sonur sem hægt var að hugsa sér,“ sagði faðir hans í kveðjumyndbandinu.
Það var í ágúst í fyrra að Alexander tilkynnti fylgjendum sínum að hann hefði greinst með krabbamein. Það gerðist eftir að hann fór til læknis vegna verkja í handleggnum og taldi hann í fyrstu að hann væri handleggsbrotinn. Myndatökur og frekari rannsóknir leiddu í ljós að um alvarlegt krabbamein væri að ræða.
