Það eru margir að skipta út gömlum eldhúsinnréttingum hjá sér enda mikið úrval og glæsilegar lausnir sem ekki voru í eldri innréttingum. Eldhús­inn­rétting er dýr fjárfesting til fram­tíðar. Ef endurnýja skal eldhúsið þarf að huga að mörgum hlutum. Það er hins vegar fátt ánægju­legra en nýtt og fallegt eldhús þeg­ar það er komið upp. Ef skipta á út gamalli innréttingu þarf að út­hugsa margt. Líklegast þarf að skipta út gólfefnum í leiðinni, það þarf að mála og væntanlega breyta um gluggatjöld. Sumir kjósa að breyta uppröðuninni á eldhús­inn­réttingunni og þá getur þurft að færa til leiðslur fyrir vatn og rafmagn. Grunnhugsunin verður því alltaf að vera hversu langt á að ganga í breytingunum og hvað munu þær kosta.

Lúxushvítt eldhús með rómantískum blæ.

Draumaeldhúsið

Innréttingafyrirtæki teikna upp innréttingar eftir óskum við­skipta­vina. Þess vegna er nauð­synlegt að vera búinn að hugsa út öll helstu atriði og alls ekki gleyma þeim smæstu sem geta í lokin orðið svo mikil­væg. Alls kyns lausnir eru til sem auðvelda starfið í eldhúsinu en arkitektar geta leiðbeint með slíkt. Gott er að vita hvað er í boði áð­ur en hald­ið er af stað. Hægt er að skoða inn­réttingar á netinu og spara sér sporin í leitinni. Auk þess er hægt að fá innblástur með því að skoða pinterest-myndir eða Face­book-hópa þar sem fólk deilir reynslu sinni. Innréttingaskipti eru ekki gerð á einum degi. Þau taka bæði tíma og fyrirhöfn.

Hvítt, nútímalegt eldhús með svörtum steini á borðum.

Hvað væri það í eldhúsinu sem þig dreymir um að hafa? Gott er að skrifa hjá sér allar slíkar óskir. Hvers saknar þú helst þegar þú ert að vinna í gamla eldhúsinu? Á eldhúsið að vera praktískt eða skiptir útlitið öllu máli? Þarftu mik­ið skápapláss eða viltu losna við efri skápa? Gakktu einnig úr skugga um að þú fáir nægilegt vinnu­rými. Það er sérstaklega mikil­vægt að geta unn­ið við hliðina á elda­vélinni og nálægt vaskinum. Með því að gera alla þessa hluti upp við sig áður en farið er af stað í innréttingaleitina gerir maður hana mun auðveldari.

Hefðbundinn viður í bland við hvíta skápa og hvítar borðplötur. Ljósbláar flísar setja skemmtilegan svip.

Gott er að fara yfir hlutina sem geyma þarf í skápum í eld­hús­inu. Það þarf að vera nægjan­legt pláss fyrir pottana, plast­skál­arn­ar, matardiskana, glösin, boll­­ana eða stóru bakkana og köku­­diskana. Ekki má gleyma mat­­vörum, kryddunum og síðan hrein­gerningarvörum eða jafnvel ryk­sugunni ef heimilið hefur ekki geymslu.

Ekki fara eftir tískubylgjum

Annað mikilvægt atriði þegar eldhúsinnrétting er valin er efni hennar. „Eldhúsið þarf að lifa af ýmsar tískubylgjur,“ segir Karolina Karlsson, sænskur inn­an­hússarkitekt, við netútgáfu Expressen. „Flestir eru svolítið kvíðn­ir þegar velja skal lit á eld­hús­innréttingu. Val á hurðum og borð­plötum mynd­ar stílinn að stór­um hluta. Ég myndi ekki mæla með að vera „töff“ í valinu. Maður þarf að hugsa til framtíðar. Það er möguleiki að setja lit á hluta inn­réttingar eða á eldhúseyju til að brjóta upp útlitið,“ segir hún og mælir með aðstoð fagmanna.

Gráar innréttingar hafa verið vinsælar að undanförnu. Þessi er mjög falleg og hentar rýminu mjög vel.

Eldhúsinnréttingar eru misdýr­ar og sömuleiðis misvandaðar. Verðið fer auðvitað eftir því hversu mikið er lagt í þær. „Algeng mis­tök eru að taka ekki prufur heim og bera við heimilið. Ágætt ráð er að mála prufu á vegg með þeim lit sem þú ert spennt fyrir, vera með skáphurð að láni, og sjá hvernig þetta kemur út miðað við hvernig birtan fellur. Það getur verið mismunandi. Ekki spara, frekar safna meira,“ segir Karolina við blaðið og bendir á að ef mann langi í marmaraborðplötur en hafi ekki efni á þeim er alveg þess virði að bíða aðeins eða þangað til nóg hefur verið safnað. Einnig bendir hún á að fá tilboð á nokkrum stöð­um og bera saman verð og hvað er innifalið í því.