Baldur Thor­la­cius er hag­fræðingur sem hefur í um fjögur ár á hrekkja­vöku skorið út gras­ker. Mág­kona Baldurs vakti at­hygli á gras­kerjunum á Twitter í gær og birti af þeim myndir. Gras­kerin eru eins ólík og þau eru mörg en á meðal þeirra má finna apa og mörg skrímsli.

„Ég byrjaði á þessu fyrir þremur eða fjórum árum,“ segir hann og að hann hafi séð ein­hvern gera þetta á netinu og á­kveðið að prófa sjálfur.

„Ég hef teiknað og unnið við þrí­víddar­grafík og það lá vel við að prófa. Það er gaman að stússa í þessu,“ segir Baldur sem býr á­samt fjöl­skyldu sinni á Leifs­götunni.

Gras­kerin hafa vakið at­hygli fólks og segist hann alveg verða var við það að fólk stoppi til að skoða gras­kerin.

„Ég sé fólk stoppa og taka myndir. Svo veit ég að leik­skóli sonar míns hefur farið í göngu­ferð til að skoða.“

Ein kvöldstund í hvert grasker

Spurður hvað þarf til að skera svona út segir Baldur að hann hafi prófað ýmis­legt. „Ég keypti ein­hvern tímann á­höld sem eru notuð við leir­lista­gerð en ég týndi þeim. Ég er núna að nota osta­hnífa og osta­skera og þeir virka mjög vel.“

Eru ríkar hrekkja­vöku­hefðir í fjöl­skyldunni?

„Já, við erum mjög spennt fyrir hrekkja­vökunni og reynum að skreyta, meira en þetta bara. Krakkarnir eru mjög peppaðir og hafa lagt inn pantanir um hvað ég eigi að skera út næst.“

Hann segir að það fari sirka ein kvöld­stund í hvert gras­ker og að það sé mis­jafnt hversu mörg hann hafi gert á hverju ári. Á síðasta ári lenti hann í því að finna engin gras­ker og skar út úr smjör­hnetugras­keri [e. butt­ernut squ­ash].

Útlitið fer eftir lagi graskersins

Í ár hefur hann skorið út þrjú gras­ker og þar á meðal eina górillu, eða King kong, að beiðni sonar síns.

„Hann var ekki á­nægður með hana , fannst hún ekki nógu grimm górilla til að vera King Kong,“ segir Baldur.

Hann segir að það fari að miklu leyti eftir stærð gras­kersins hvað það verði. Veggurinn sé þrír eða fjórir senti­metrar og því þurfi að gera eitt­hvað sem er líkt lagi gras­kersins.

„Annars sker maður of mikið og fer í gegn.“