Gistiheimilið Ásar er staðsett á fallegum stað í Eyjafirðinum um það bil 10 kílómetra fjarlægð frá Akureyri þar sem mikil veðursæld ríkir og blómlegt gróðurfar. Hrefna nýtur þess að taka á móti gestum gistiheimilisins sem og hópum í mat en hægt er að bóka morgunmat á Ásum án þess að vera í gistingu þar. Einnig er hægt bóka hópa í mat sem nýtur mikilla vinsælda og snæða í félagsskap þeirra hjóna.

„Þá bjóðum við upp á ekta íslenska heimilismat sem erlenda ferðamanninum finnst einstök upplifun að njóta. Oftar en ekki snæðum við gestgjafarnir með þeim hópum sem koma og eru það ómetanlega skemmtilegar samverustundir,“ segir Hrefna.

Heimalagaði morgunverðurinn er sérstaða Hrefnu og fangar morgunverðarborðið auga og munn enda mikill menntaður í það lagt.
Herbergin eru stílhrein þar sem rómantíkin svífur yfir.

Morgunmaturinn er sérstaða Hrefnu og býður hún upp á heimabakað brauð, heimatilbúið, heimatilbúið músli ásamt heimagerðum sultum og fleira góðgæti, eins krúttlegum sætum bitum og heimabökuðum kleinum.

„Hér líður mér best, eldhúsið er minn staður og mér þykir skipta miklu máli að taka vel á móti gestum okkar,“ segir Hrefna og bætir við að hún elski hreinlega að vera í eldhúsinu að framreiða heimagerðar kræsingar og dekka upp fallegt morgunverðarborð.

„Við fáum hópa í mat frá Bandaríkjunum. Þetta eru vel skipulagðar ferðir með amerískri ferðaskrifstofu. Hóparnir eru litlir og fáum við mest átta manns í einu. Þau stoppa hjá okkur í tvo tíma og vilja fræðast um alls konar og segja okkur frá sér. Þetta eru mjög skemmtilegir hópar og við höfum mjög gaman að þessu. Við tökum á móti nokkrum hópum á vorin og nokkrum á haustin. Við höfum yfirleitt boðið þeim upp á þorskhnakka, ofnbakaðar kartöflur, ferskt salat, mangósósu og heimabakað brauð. Það slær ávallt í gegn og þeim sem koma finnst það mikil matarupplifun að koma og fá íslenska heimilismat,“ segir Hrefna.

Smátriðin skipta máli í heildarupplifuninni.
Rómantískt baðherbergi með hornbaðkari.

Gistiheimilið Ásar er einstaklega huggulegt og rómantískt en þegar börn þeirra hjóna fluttu að heiman breytu hjónin heimili sínu í gistiheimili enda hafði það verður draumur Hrefnu í mörg ár að fara í ferðaþjónustuna og bjóða upp á persónulega gistingu og þjónustu. Hrefna er kennaramenntuð og hefur í mörg ár starfað sem slíkur í Hrafnagili en nú á ferðaþjónustan hug hennar allan. Það sést að Hrefna sinnir gistiheimilinu af mikilli ástríðu og natnin, hjá henni verða öll smáatriði að ævintýralegri upplifun. Hrefna leggur upp úr því að hafa gistinguna heimilislega án þess að vera með of mikið af munum.

Á gistiheimilinu eru fjögur herbergi, með stílhreinu og rómantísku ívafi. Fallega uppábúið rúm, þar sem hugsað er fyrir hverju smáatriði og sloppar og inniskór fylgja öllum herbergjum. Á gistiheimilinu er pallur með heitum potti á besta stað þar sem útsýnið skartar sínu fegursta yfir Eyjafjörðinn og fjallasýnin er stórbrotin.

„Ég ætla að gefa lesendum uppskriftina af þorskhnökkunum og mangósósunni en þetta er réttur sem við bjóðum gestum okkar gjarnan upp á. Ég er búin að senda þessar uppskriftir út um allan heim. Þetta eru reyndar ekki beint uppskriftir, meira svona slatti og sletta.“

Hvítlauks- og sítrónumaríneraður þorskhnakki með mangósósu nýtur mikilla vinsælda hjá ferðamönnum.s

Hvítlauks- og sítrónumaríneraðir þorskhnakkar

1 kg þorskhnakkar

1 dl ólífuolía

Safi og rifinn börkur af einni sítrónu

2 -3 hvítlauksrif

Fersk steinselja, söxuð

Best á fiskinn

Olía, sítrónusafi og börkur, hvítlaukur, krydd og steinselja hrært saman. Hnakkarnir skornir í bita og lagðir í lögin. Hrært saman. Láta þetta liggja í kæli í nokkra klukkutíma. Sett í eldfast mót og sett inn í ofn á 190°C í 13 mínútur.

Mangósósa

1 dós sýrður rjómi

1 dós sýrður rjómi með lauk og graslauk

2 hvítlauksrif

2-3 msk. mangó chutney

2 tsk. sætt sinnep

Allt hrært saman og passar mjög vel með fiskinum, kjúklingi, salati, bara flest öllu. Þessi sósa slær alltaf í gegn.

Dásamlegt er að sitja úti á pallinum og njóta veitinga í sumarfegurð Ása.