Við spurðum Ernu Maríu Eiríksdóttur, snyrtifræðing hjá snyrtistofunni, Verði þinn vilji, hverju ætti helst að huga að þessa köldu mánuði en hún segir mikilvægt að forðast að nota rakakrem í frosti.

Erna María Eiríksdóttir snyrtifræðingur segir mikilvægt að forðast að nota rakakrem í frosti.

Rakaþurrkur

Rakaþurrkur lýsir sér þannig að mann fer að klæja í andlitið og stundum á höndum og fótum og jafnvel um allan líkamann. Þetta er hægt er að koma í veg fyrir með því að bregðast rétt við og vera með réttar vörur á andlit og líkama. Einnig hjálpar það að drekka nóg af vatni við að halda góðum raka í líkamanum.

Gott er að bera verndandi krem á húðina. Oftast þarf að skipta um krem á veturna og nota feitari krem, en þó eru ekki allir sem þurfa þess. Gott er að bera farða eða púður á andlit til að verja húðina gegn utanaðkomandi áhrifum og hitamismun.

Þurrkublettir

Þurrkublettir í húð eru mjög algengir yfir vetrartímann, þá þurfa sumir að nota tvö mismunandi krem, serum eða húðolíu á þurru svæðin. Húðin getur virkað ótrúlega „þyrst” í kuldanum. Finnst þér þú vera að bera endalaust á þig krem og ekkert gerist? Þá ertu sennilega að nota rakakrem sem þurrkar húðina enn meir. Betra er að nota húðolíu eða gott nærandi krem, góð næring fyrir húðina veitir vörn gegn kulda.

Oftast þarf að skipta um krem á veturna og nota feitari krem, en þó eru ekki allir sem þurfa þess. Nordphotos/Getty

Djúphreinsun

Gott er að djúphreinsa húðina einu sinni til tvisvar í viku til að örva blóðflæðið, hreinsa burt dauðar húðfrumur og stuðla þannig að heilbrigðri endurnýjun húðarinnar. Þetta gerir það líka að verkum að kremið sem við setjum á okkur nær lengra niður í húðina þ.e að virku efnin í kreminu komast dýpra í húðina.

Rakaþurrkur og fituþurrkur

Húðþurrkur skiptist í tvær tegundir; rakaþurrk og fituþurrk. Fólk undir 35 ára er yfirleitt með rakaþurrk en þá virkar húðin t.d. strekkt eftir sturtu og þurrkurinn finnst á húðinni, þurrkublettir.

Fituþurrkur er meira undirliggjandi og finnst hann yfirleitt ekki á húðinni heldur virkar eins og pirringur í henni. Eins gott og það er að bera á sig rakakrem þegar maður er rakaþurr í húðinni þá er ekki gott að bera á sig 100 prósent rakakrem þegar það er kalt og frost er úti. Því að eins og við vitum þá frýs vatn!

Því er miklu betra að bera á sig krem sem eru gerð sérstaklega til að vernda húðina í kulda og gefa henni einnig þann raka og fitu sem að hún þarf. En það getur einnig verið gott að eiga rakamaska til að bera á sig einu sinni til þrisvar í viku á kvöldin ef húðin er mjög þurr.

Gott er að taka inn C, E og A – vítamín en það eru andoxandi efni og rannsóknir hafa sýnt að þau vernda húðina og geta dregið úr þurrki og húðskemmdum. Nordicphotos/Getty

Vítamín

Gott er að taka inn C, E og A – vítamín en það eru andoxandi efni og rannsóknir hafa sýnt að þau vernda húðina og geta dregið úr þurrki og húðskemmdum.

Einnig er hægt að fá raka í húðina innan frá t.d með vatnsdrykkju og með því að taka inn fjölómettaðar fitusýrur, sérstaklega Omega 3. Auðvelt er að fá Omega 3 úr fiski, hörfræjaolíu, graskersfræjum, ólífuolíu og möndlum.

Kryddaður matur eins og t.d engifer og chili þurrkar húðina, einnig koffín og áfengi.