Hönnunarteymið Formatyka sigraði í hönnunarkeppni um götugögn Borgarlínunnar.

Götugögnin eru hlutir á borð við létt skýli, bekki, og fleira sem munu hafa einkennandi útlit fyrir Borgarlínuna og borgarbraginn á höfuðborgarsvæðinu um ókomin ár.

Tillagan Lifa, njóta, ferðast – endurtaka sigraði samkeppnina sem Hönnunarmiðstöð Íslands og Borgarlínan stóðu fyrir.

Krystian Dziopa og Iga Szczugiel er fólkið á bakvið tillöguna en þau mynda saman hönnunarteymið Formatyka.

Í umsögn dómnefndar um segir: „Tillagan skapar nútímalega táknmynd fyrir Borgarlínu framtíðarinnar og býr til sterkt kennileiti í umhverfinu sem eykur á gæði almenningsrýma. Tillagan byggir á fjölhæfu einingarkerfi og því er auðvelt að laga hana að fjölbreyttum aðstæðum innan borgarlandslagsins."

Krystian Dziopa og Iga Szczugiel mynda saman hönnunarteymið Formatyka.
Ljósmynd/ Anna Margrét Árnadóttir

Tilkynnt var um sigurvegara keppninnar í gær við athöfn í Ráðhúsi Reykjavíkur.

Annað sætið hlaut tillagan Taktur eftir Önnu Leoniak og Bjarna Kristinsson en þriðja sætið hlotnaðist þeim Karli Kvaran, Lilju Kristínu Ólafsdóttur og Sahar Ghaderi með tillöguna Línan. Alls bárust 16 tillögur í samkeppnina en þrjár þeirra hlutu verðlaun, auk þess sem dómnefnd veitti þremur teymum sérstaka viðurkenningu fyrir vel útfærðar tillögur.

Dómnefnd skipuðu Þráinn Hauksson, Marcos Zotes, Sigurborg Ósk Haraldsdóttir, Björg Fenger og Rut Káradóttir.

Stuðla að betri og heildstæðari borgarbrag

Með götugögnum er átt við hluti á borð við bekki, upplýsingaskilti, ruslatunnur, ljósastaura og minni skýli. Tilgangurinn með samkeppninni var að til verði banki af götugögnum sem hægt er að velja úr eftir þörfum á hverri stöð. Götugögnin, sem einkenna munu Borgarlínustöðvarnar í öllum sveitarfélögum, eiga að hafa samræmt og einkennandi yfirbragð sem mun stuðla að betri og heildstæðari borgarbrag auk þess að bæta upplifun notendans.

Hér má sjá stoppistöð við Hátún.
Ljósmynd/ Anna Margrét Árnadóttir