Margrét segist alla tíð hafa haft mikla ástríðu fyrir matargerð. Hún var aðeins sextán ára þegar hún byrjaði að vinna í eldhúsi. Hún var hjá Happ í sjö ár en meðan á náminu stóð starfaði hún hjá Geira Smart og Vox Hilton. Margrét, sem er dóttir Bjarna Benediktssonar og Margrétar Þóru Baldvinsdóttur, segir að hún hafi erft matarástríðuna beint í kvenlegg en móðir hennar er þekktur matgæðingur.

Margrét á ellefu mánaða gamlan son og er í barneignarfríi frá eldhúsinu. Hún hefur þó látið hendur standa fram úr ermum og er að klára aðra önn í lögfræði. „Mig langar í framtíðinni að nýta mér þekkinguna og starfa við bæði þess fög enda tel ég þau alveg geta farið saman,“ segir hún. „Það var eiginlega kærastinn sem átti hugmyndina af því að ég færi í lögfræði. Honum fannst mjög góð hugmynd að ég skellti mér í frekara nám og eftir að ég kynnti mér lögfræðina var ég bara sammála. En maður þarf að skipuleggja sig vel svo þetta takist allt,“ segir hún. „Ég vonast þó til að fara aftur að vinna í eldhúsi í sumar þegar sá litli kemst í leikskóla.“

Taílenska súpan hennar Margrétar lítur girnilega út og er bragðmikil.

Þegar hún er spurð um súpuuppskriftina sem hún gefur lesendum, segist hún alltaf hafa verið hrifin af asískum mat og þessi súpa sé í miklu uppáhaldi. „Þetta er taílensk súpa sem rífur aðeins í. Ég hef eldað hana í meira en tíu ár, oft boðið upp á hana í matarboðum og alltaf slegið í gegn,“ segir hún. „Hún er bragðmikil og ég nota kjúkling í hana og hrísgrjónanúðlur. Ég hef líka prófað að setja rækjur og fisk með góðum árangri. Systir mín, sem er níu ára, biður mig oft um þessa súpu en til að deyfa hana set ég auka skammt af kókósrjóma í hennar súpu. Ég myndi segja að hún henti vel í fermingarveislu, sérstaklega ef þemað er tengt Asíu. Súpan er mjög saðsöm og óþarfi að hafa brauð með. Frekar myndi ég hafa góðan desert með mangó eða pavlóvur, jafnvel marensrúllu.“

Þegar Margrét fermdist var smáréttaveisla, eins konar tapasstemning, útskýrir hún. „Það var kokkur sem útbjó snittur og smárétti sem var mjög fínt. Ég á ekki von á að fara í fermingu á þessu ári. Önnur systir mín fermdist fyrir tveimur árum og hin er enn svo ung. Hér er súpan hennar Margrétar. Uppskriftin er miðuð við fjóra en hægt að stækka hana eftir þörfum.

Meðal hráefna í súpuna er engifer, límóna og chilli.

Taílensk kjúklinga- og núðlusúpa

  • 3 kjúklingabringur, skornar í grófa bita
  • Vermicelli núðlur
  • 1/2 rauð paprika, skorin í grófa bita
  • 1/2 græn paprika, skorin í grófa bita
  • Handfylli af sykurbaunum
  • Handfylli af brokkólí, skorið í bita
  • 1/2 laukur, skorinn í grófa bita
  • 1/2 rauður chilli, saxa
  • 10 cm engifer, rifið í rifjárni
  • 2 fernur kókosrjómi (bestur í fjólubláu fernunum frá Santa Maria)
  • 1 dós kókosmjólk
  • 2 msk. fiskisósa
  • 1 tsk. rautt karrí paste
  • 1-2 msk. penang karrí paste
  • 1 tsk. sambal oelek
  • 2 lárviðarlauf
  • 1 kjúklingakraftsteningur
  • 1/2 lime kóríander

1. Byrjið á því að skera niður grænmetið og kjúklinginn.

2. Setjið í pott kókosmjólk, kókosrjóma, kjúklingakraft, lárviðarlauf, chilli og engifer. Hitið á meðalháum hita.

3. Bætið næst við fiskisósu, penang karrímauki og rauðu karrímauki

4. Á meðan súpan mallar steikið þá kjúkling á pönnu með olíu og saltið. Þegar kjúklingurinn er tilbúinn bætið honum þá út í súpuna

5. Þegar kjúklingurinn er kominn út í súpuna skal steikja paprikurnar og lauk á pönnu í um það bil 1 mínútu, bætið þá brokkólíinu og sykurbaununum við og steikið í 2 mínútur til viðbótar.

6. Bætið grænmetinu út í súpuna og kreistið 1/2 lime yfir og látið malla á meðan þið undirbúið núðlurnar.

7. Hitið vatn í potti og setjið vermicelli núðlurnar í pottinn í 2 mínútur þegar vatnið hefur náð suðu.

8. Sigtið vatnið frá og skammtið núðlum í skálar.

9. Að lokum, hellið súpunni yfir núðlurnar og setjið kóríander eftir smekk.