Fjórðubekkingarnir Helgi Hrafn Magnússon og Kjartan Gestur Guðmundsson sungu og dönsuðu af gleði þegar þeir fengu fréttir af á­huga Nike á Íslandi á teikningum þeirra. Þetta segja mæður þeirra en þeir vinirnir komust í fréttir á dögunum fyrir fram­tak sitt til neyðar­söfnunar UNICEF á Ís­landi fyrir börn í Úkraínu.

Vinirnir eru miklir myndlistar- og skóáhugamenn en þeir seldu teikningar sínar af skóm og færðu UNICEF andvirði sölu fjölda mynda, alls 26 þúsund krónur, síðastliðinn föstudag.

Fréttablaðið/Axel Þórhallsson

„Eftir að fréttir fóru að berast af teikningum þeirra jókst á­huginn á þeim til muna og núna er mikil eftir­spurn hvar sem þeir fara“ sögðu mæður þeirra.

Nike keypti myndirnar á fúlgur fjár

Og nú hefur Nike á Ís­landi hefur á­kveðið að kaupa tvær teikningar af þeim félögum fyrir samtals 200 þúsund krónur.

Nike á Ís­landi veitti því at­hygli að megnið af myndunum frá þeim voru myndir af Nike skóm. Þeir segjast hafa mikið dá­læti á Nike og það hafi hvatt þá til þess að skreyta skó en þeir fengu síðan þá hug­mynd að það væri sniðugt að teikna og hanna skó á blaði. Þeir hafi síðan byrjað að selja þessar myndir.

Kolbrún Pálína Helgadóttir, kynningarstjóri Icepharma, sá um viðskiptin við drengina.
Fréttablaðið/Axel Þórhallsson

Nike á Ís­landi á­kvað því að kaupa sitt­hvora myndina frá drengjunum á 100 þúsund krónur hvora. Kaupin fóru fram með viðhöfn í Hofi á Akur­eyri í gær og þar fengu listamennirnir greiðslu fyrir verk sín í umslögum.

Við sama tækifæri afhentu þeir Helgi Hrafn og Kjartan Gestur því UNICEF stoltir 200.000 krónur.

„UNICEF á Ís­landi og Nike færir þessum góð­hjörtuðu ungu drengjum hjartans þakkir fyrir stuðninginn sem mun nýtast vel í um­fangs­miklum verk­efnum UNICEF, Barna­hjálpar Sam­einuðu þjóðanna, í Úkraínu og við landa­mæri ná­granna­ríkja“, segir í sam­eigin­legri til­kynningu sem barst Frétta­blaðinu.

Drengirnir fengu Nike fatnað og skó í þakklæti fyrir söfnunina.
Fréttablaðið/Axel Þórhallsson
Fréttablaðið/Axel Þórhallsson
Fréttablaðið/Axel Þórhallsson