María Gomez heldur úti matarblogginu Paz.is sem ætlað er nautnaseggjum sem hafa gaman af því að baka og elda góðan mat án mikillar fyrirhafnar, en flestar uppskriftirnar eru í einfaldari kantinum. María er mikill sælkeri og segist alltaf hafa haft gaman af því að reyna fyrir sér í eldhúsinu og fáum við að birta úrval uppskrifta úr fórum hennar.

María Gomez birtir reglulega girnilegar uppskriftir á vefsíðu sinni paz.is

Stökk skinkuhorn með mjúkri fyllingu

650 ml volgt vatn

2 msk sykur

20 g þurrger (eða 2 bréf)

1 msk salt

2 msk olía

1 kg hveiti / einnig hægt að nota heilhveiti 50 % á móti því hvíta

Fylling

1/2-1 pakki (athugið ekki svona umslag) venjuleg brauðskinka

1 dós skinkumyrja

1/2 pakki beikon

1 poki rifinn pakkaostur

Hornin eru fyllt með beikoni, skinku, skinkumyrju og osti sem gerir þau einkar safarík.

Blandið saman volgu vatni, sykri og geri og látið standa í 5 mínútur þar til freyðir.

Bætið þá olíunni við.

Því næst skal bæta við saltinu og hveitinu hægt og rólega.

Allt hrært saman og deigið hnoðað.

Látið svo hefast í um það bil eina klukkustund.

Skiptið svo deiginu í fjóra parta og fletjið hvern part út eins og pizzu.

Skerið svo í það eins og átta pítsasneiðar og þá eruð þið með átta þríhyrninga.

Best er að nota pítsaskera en einnig er hægt að nota beittan hníf.

Hrærið næst saman öllum innihaldsefnum úr fyllingunni en gott er að klippa beikonið smátt út, í og hafa það bara hrátt það eldast við bökun.

Því næst er fyllingin sett nær endanum á þríhyrningnum og honum svo rúllað upp í horn.

Hrærið saman mjólk og einu eggi og penslið á hornin.

Gott er að strá fræjum yfir hornin á meðan þau eru ennþá blaut, og enn betra er að strá rifnum osti.

Bakið við 200 C° hita (blástur) í um það bil 10 til 15 mínútur eða þar til þau eru orðin gullinbrún.

Gott ráð er að baka nóg af hornum og frysta svo og hita upp þegar það vantar gott nart fyrir gesti og gangandi eða nesti fyrir börnin.