Bjarmi fór í nám í blómaskreytingum og segir námið hafa víkkað út hönnunarsjáaldur sitt til muna.

„Ég starfa sem vöruhönnuður og er nú að tvinna þessu tvennu saman. Blandan býður upp á endalausa möguleika. Ég vil samt frekar kalla mig blómabæti en blómaskreyti.“

Ertu kominn í jólaskapið?

„Ég er að gíra mig upp. Ég byrjaði fyrr á árinu að safna að mér efniviði fyrir jólakransagerðina og vinn núna í því að setja saman kransa og skreytingar fyrir jólin. Ég er kominn með þónokkrar pantanir svo það er því ekki úr vegi að byrja snemma.“

Ertu mikið jólabarn?

„Ég var það þegar ég var yngri, en það fjaraði smám saman út eftir því sem ég eltist. Eftir að ég færði mig inn í plöntu- og blómaheiminn er jólagleðin að vakna aftur til lífsins. Ég kem mér í gírinn þegar ég byrja að handfjatla efniviðinn og finn lyktina, þá síast jólastemningin inn í gegnum skynfærin.“

Bjarmi notar greinar, hreindýramosa, lyng og fleira í kransagerðina.

Jólin kalla á að hafa jólalegt í kringum sig en það þarf ekki endilega að skreyta með hlutum. Það má líka skreyta með stemningu.

Nýtir gjafir náttúrunnar

„Vilji maður nýta náttúruna í jólaskreytingarnar er best að huga að því strax að vori. Ég byrjaði síðasta vor að safna mér efniviði; stráum, melgresi og fleiru til að þurrka. Síðustu vikur hef ég svo sankað að mér könglum, mosa, lyngi og greinum.

Það er líka sniðugt að setja plöntur niður að vori sem þurrkast fallega og nýtast í skreytingar að hausti eða fyrir jólin. Uppáhaldið mitt er alpaþyrnir, en blómið þurrkast mjög skemmtilega og heldur sér vel. Náttúran býr yfir miklum sjarma og gefur okkur ótrúlegar gjafir. Við þurfum bara að opna augun. Núna er fínn tími til að safna hreindýramosa. Svo get ég enn farið út og týnt lyng í kransagerðina og það kemur rosalega vel út í krönsunum. Það eru jafnvel enn þá ber á því. Svo bara þorna þau og verða að rúsínum,“ segir Bjarmi og hlær.

Hann bætir við að það sé allaf góð hugmynd að skola allt úr náttúrunni með sjóðandi vatni, „svo maður sé ekki að fá einhverja óboðna gesti í jólasteikina.“ Hann minnir líka á að þurrkaðar plöntur eru tilvalinn eldmatur og því er mikilvægt að passa að skrautið sé ekki of nálægt lifandi kertaloga.

Jólin eiga sinn tímabundna líftíma rétt eins og blómin

Bjarmi er fagurkeri og finnst æðislegt að hafa fallegt í kringum mig. Á heimilinu segir hann þó ekki mikið til af jólaskrauti. „Það er til einn kassi með jóladóti sem okkur Bjarna þykir vænt um. Mest munir úr barnæsku og skraut sem maður fékk í skóinn sem krakki. Jólin kalla á að hafa jólalegt í kringum sig en það þarf ekki endilega að skreyta með hlutum. Það má líka skreyta með stemningu. Eitthvað sem maður skynjar með augum, eyrum, munni og nefi. Ég nýti ljós, kerti, lykt og tónlist til að gera jólalegt. Svo bý ég til skreytingar úr lifandi plöntum, greinum og blómum fyrir jólin. Jólin eru svo stuttur tími og því má jólaskrautið alveg vera lifandi. Líkt og plönturnar eiga jólin sitt lífsskeið. Svo eru þau búin. Jólin þurfa ekki að safna ryki á milli ára í geymslunni.“

Hann einskorðar sig við bönd og borða úr niðurbrjótanlegum efnum.
Hann gerir einnig ýmisar jólaskreytingar sem gaman er að koma fyrir inni sem úti.

Allar þessar plastslaufur og borðar. Kransarnir eru vafðir með alls konar plastefnum og undirlagi úr plasti. Þetta er allt enn þá þarna.

Plastið yfir gröfum ástvina okkar

„Eitt af mínum grunngildum sem hönnuður og manneskja, er að sýna samfélagslega ábyrgð og að hafa sjálfbærni að leiðarljósi. Mér finnst mikilvægt að huga að umhverfinu í vali á jólaskrauti og spyr sjálfan mig spurninga áður en ég set eitthvað í innkaupakörfuna. Hvaðan kemur varan? Hver framleiðir hana? Hvert er umhverfissporið? Getur hún gegnt fleira en einu hlutverki heima hjá mér? Hver er ending vörunnar og hvar endar hún að notkun lokinni? Þetta skiptir allt máli.

Ég hef það fyrir reglu og áskorun að vinna vörur og skreytingar úr umhverfisvænum efnum. Því meira íslenskt, því betra. Ég nota aldrei plast, vír eða skaðleg efni. Kransarnir mínir eru 100% niðurbrjótanlegir, fyrir utan kertahaldara, sem eru endurnýtanlegir.

Ég er að prufa mig áfram með að nota matarglimmer í staðinn fyrir hefðbundið glimmer, sem er náttúrulega ekkert annað en míkróplast og hrikalegt fyrir umhverfið. Svo er ég að prófa að nota gervisnjó úr sterkju, sem er niðurbrjótanlegur og laus við plast. Ég nota engin flókin textílefni og skipti tauborðum út fyrir náttúrulegt band og borða úr jurtaefnum. Í stað þess að nota gerviepli eða plastmandarínur, af hverju ekki að nota bara alvöru epli og mandarínur? Ég er svo búinn að safna fullt af fræjum úr könglatínslunni og sé fram á að gróðursetja þau til að jafna kolefnissporið.

Eitt sem ég er mjög á móti í blómaskreytingaheiminum er blómamassinn. Þetta er algert eitur. Þú andar þessu að þér við að vinna þetta og svo fer þetta út í vistkerfið þegar fólk bleytir þetta í vaskinum. Þetta er mesti plastviðbjóður sem þú getur hugsað þér og brotnar ekki niður í náttúrunni. Sama með blómavírinn. Hann er alger óþarfi og brotnar ekki niður nema á mjög löngum tíma. Hugsaðu þér alla leiðiskransana sem hafa farið niður með kistunum. Allar þessar plastslaufur og borðar. Kransarnir eru vafðir með alls konar plastefnum og undirlagi úr plasti. Þetta er allt enn þá þarna. Ég nota heldur aldrei sellófan, sem er náttúrulega bara plast. Sama með plastglimmer.“

Það er einfalt að bæta kertum í skreytingarnar. Mandarínan sómir sér vel á þessum aðventu­kransi.

Í umhverfinu frá barnæsku

Hefur þú alltaf verið blómabarn?

„Plönturnar hafa verið í umhverfinu mínu allt frá barnæsku, en það má segja að ég hafi ekki fengið delluna fyrr en ég flutti að heiman. Núna er ég haldinn krónískri plöntusýki og á hundruð pottaplantna heima hjá mér. Eftir að ég byrjaði í blómaskreytinganáminu opnuðust augu mín fyrir blómunum og ég er byrjaður að kafa dýpra í blómahafið.“

Hvaða blóm heilla yfir jólahátíðirnar?

„Blómin eru alltaf geysivinsæl um hver jól og hafa stimplað sig fast inn í jólahefðir margra Íslendinga. Ég skipti jólaplöntum í þrjá flokka. Það eru pottaplönturnar eins og riddarastjarnan, hýasintan og jólastjarnan. Í öðru lagi eru það afskorin blóm. Þar eru túlípanarnir orðnir alger klassík. Í þriðja lagi eru það greinar, þá aðkeyptar eins og tröllatré (eucalyptus) og ílex með rauðu berjunum eða bara klipptar af furunni eða birkinu úti í garði. Íslendingar vilja og þurfa að ljóstillífa yfir hátíðirnar og plönturnar gleðja og bæta. Við erum að sigla inn í dimmasta tíma vetrarins og það er ekki spurning að plönturnar eru kærkomin gleðigjöf sem frískar upp á skammdegisgrámann. Þannig styðjum við líka við bakið á íslenskum blómabændum.“

Könglar og mandarínur eru fallegar á jólaborðinu. Servíettuhringurinn er úr Sn50 línunni.

Sn50

Bjarmi hannar líka forkunnarfagra servíettuhringi úr tini í samstarfi við Kristínu Soffíu undir nafninu Stundum Studio. „Við endurnýtum tin úr gömlum munum. Nytjamarkaðarnir eru stútfullir af munum úr tini. Myndarammar, könnur, bikarar, glös, kertastjakar og fleira. Servíettuhringirnir eru fyrsta línan úr tinlínunni okkar, Sn50, sem er nafn tins í lotukerfinu. Málminn mótum við að japanskri forskrift og er hver servíettuhringur einstakur.“

Servíettuhringirnir eru væntanlegir til sölu í Mikado Reykjavík, að Hverfisgötu 55.

Hægt er að fylgjast með Bjarma Fannari á Instagram: _bjarmii. Einnig er hann með vefsíðu: bjarmii.com.