Framleiðendur Spider-Man kvikmyndanna hafa samið við breska leikarann Tom Holland, til að túlka persónu Fred Astaire í nýrri kvikmynd um ævi Astaire. Hinn tuttugu og fimm ára gamli Holland hefur farið með hlutverk Köngulóarmannsins síðan 2016, við góðar viðtökur. Hann hlaut BAFTA verðlaun aðeins tvítugur að aldri, í flokki rísandi stjarna.

Fred Astaire er álitinn einn besti dansari kvikmyndasögunnar, en blómlegur ferill hans spannaði 79 ár og náði hátindi sínum á gullaldartímabili Hollywood. Hann lék í 10 söngleikjum á West End, 31 söngleikjamynd, fjórum sjónvarpsþáttaröðum og fleiru. Þá má nefna stórleik hans í myndum á borð við Holiday Inn (1942), Easter Parade (1948) og The Band Wagon (1953).

Astaire vakti athygli fyrir framúrskarandi klæðaburð og var talinn tískugoðsögn í lifanda lífi, langt fram eftir aldri. Stíllinn samanstóð af aðsniðnum jökkum, litríkum skyrtum og axlaböndum, auk þess sem hann brá gjarnan fyrir sig silkiklút í stað mittisbeltis.

Fred Astaire hélt einkalífi sínu utan heimspressunnar en hann lést í hárri elli árið 1987. Hann hafnaði ætíð boðum kvikmyndun á ævi sinni, og fyrir andlátið tók hann skýrt fram að hann kærði sig engan veginn um að líf hans yrði nokkru sinni túlkað á þeim vettvangi.

Tom Holland er alls ekki slæmur dansari enda með bakgrunn í fimleikum.