„Ég hef engan hitt sem lítur þetta ekki bara jákvæðum augum. Þetta bara vekur athygli á okkur og við fáum góða og jákvæða kynningu.
Síðan er ekkert verra að þetta lyftir andanum, eins og sagt er, þar sem janúar og febrúar eru náttúrlega oft leiðinlegustu mánuðir ársins,“ segir Eyrún Ingibjörg Sigþórsdóttir, sveitarstjóri Dalvíkurbyggðar þar sem enn eru jól.
„Já, já. Ég held að það sé ekkert leyndarmál að við vorum beðin um það að taka ekki niður jólaskrautið í kringum þessa tökustaði. Þannig að við höldum líka jólunum lengur.
Eyrún segir að vissulega sé það svolítill pakki að fá fjölmennt kvikmyndatökulið í heimsókn en allt gangi þetta vel og samskiptin við gestina hafi verið með allra besta móti.
„En þetta er skemmtilegur, síðbúinn jólapakki og bara ekkert nema gott um samtalið og samstarfið að segja við þau sem standa að þessu.“
Spennan er að nálgast hámark því gera má ráð fyrir að stórstjarnan Jodie Foster og aðrir leikarar fari að láta sjá sig þar sem tökurnar hefjast um mánaðamótin en sveitarstjórinn segir eftirvæntinguna ekki síður mikla eftir því að sjá Dalvík á skjánum sem ígildi Ennis í Alaska.
„Ég held að það verði svolítið mikil upplifun fyrir okkur sem búum hér að sjá þættina og hvernig þetta allt saman lítur út eftir að hafa fylgst svona náið með þessu,“ segir tímabundinn bæjarstjóri Ennis í Alaska og hlær.
