Verbúðin, Blackport á ensku, er sjónvarpsþáttaröð í átta hlutum, og verður frumsýnd á RÚV fyrri hluta árs 2021. Gísli Örn Garðarsson, Björn Hlynur Haraldsson og Mikael Torfason skrifa handritið og þeir tveir fyrrnefndu leikstýra ásamt Maríu Reyndal.

Tökur á þáttaröðinni hófust fyrr í þessum mánuði og munu halda áfram fram eftir sumri á höfuðborgarssvæðinu og Vestfjörðum en þættirnir gerast í íslensku sjávarþorpi á umbrotaárunum 1983-1991.

Guðjón Davíð Karlsson er í hópi fjölmargra leikara í Verbúðinni.

Verbúðin segir frá uppgangi lítillar útgerðar sem hjónin Harpa og Grímur byggja upp af miklum dugnaði, ásamt vinafólki sínu, samhliða því að íslensk stjórnvöld innleiða fiskveiðikvóta gegn ofveiði á fiskistofnum við Íslandsstrendur.

Hópurinn yfirtekur verbúðina með öllu tilheyrandi en aðstæður þar eru eftir atvikum mjög lifandi og litríkar. Eftir að kvótinn kemur til sögunnar laga vinirnir svo viðskiptahætti og lífsstíl að breytingum í samfélaginu. Hugsjónir og valdafíkn rekast á, vinir svíkja vini og stjórnmálamenn reyna eftir fremsta megni að fóta sig í síbreytilegum heimi.

Nína Dögg Filippusdóttir og Björn Hlynur Haraldsson fara með hlutverk Hörpu og Gríms en fjöldi leikara kemur við sögu í þáttunum, þar á meðal Gísli Örn Garðarsson, Guðjón Davíð Karlsson, Unnur Ösp Stefánsdóttir og Kristín Þóra Haraldsdóttir.

Leikstjórinn, handritshöfundurinn og einn aðalleikarinn, Björn Hlynur, og Gói í senu þar sem mikið virðist liggja við.
Gísli Örn og Skúli Helgi Sigurgíslason bíða þess að dallurinn verði sjóklár.
Mynd/Eggert Þór Jónsson
Mynd/Eggert Þór Jónsson
Mynd/Eggert Þór Jónsson
Gísli Örn, Nína Dögg og Eva Lind Rútsdóttir niðursokkin í kvótabraskið.