Við Alba höldum upp á hvern einasta dag með lekkerheitum en þegar við höldum upp á Jesúbarnið erum við extra sparilegar. Þá nýtum við öll tækifæri til að gæða okkur á súkkulaði og heslihnetum,“ segir Áslaug í undurfögru „miniature“ jólaboði með Ölbu sem er fimm ára.

„Ilmurinn í Alba Piemonte á Ítalíu setti sjálfsagt tóninn en þangað fórum við fjölskyldan þegar Alba var fimm mánaða. Þar eru Nutella-verksmiðjurnar sem einnig búa til Ferrero Rocher-molana og súkkulaði- og hnetuanganin sem mætti okkur þegar við stigum út úr bílnum í Alba er ógleymanleg. Þar með hófst áhuginn á súkkulaði og heslihnetum,“ upplýsir Áslaug innan um litríka smárétti sem gleðja lítil sem stór augu.

Alba hefur ánægju af því að slá upp litlum og girnilegum veislum með undurfögrum borðbúnaði með Áslaugu, ömmu sinni.

„Mér finnst mikilvægt að eiga sitthvað fallegt fyrir augu, munn og maga okkar Ölbu á aðventunni. Það gefur lífinu lit og í aðdraganda jóla á maður að gera sér sem flesta glaða daga. Meira að segja er hafragrauturinn á mánudagsmorgni borinn fram í fallegum skálum með kertaljósum og gleði,“ segir Áslaug sem hefur Ölbu oft í huga þegar hún ferðast um heiminn og sankar að sér litlum kökum og sætindum til að gleðja þá litlu.

Litagleði og frumlegar matarútfærslur einkenna veisluhald matarhönnuðarins Áslaugar.

„Ég hef lært svo mikið af Ölbu. Hún stingur reglulega upp á því að baka pönnukökur og af því mannskepnan á það til að segja: „Ekki núna,“ segi ég alltaf: „Já, því ekki það, Alba mín.“ Það er nefnilega engin hugmynd of galin hjá börnum sem vilja gera lífið litríkt og skemmtilegt og við eigum að leyfa þeim sem mest að leggja á borð og útbúa svolítil veisluhöld eftir þeirra eigin skapi og smekk,“ segir Áslaug og víst er að þær Alba eru einstakar vinkonur.

Múffur með blikandi kertaljósum og panettone-kökur með bleikum rósum.

„Ölbu finnst allt svo sparilegt og er eina týpan í heiminum sem fattar mig alveg í botn. Hún er ljón og ég rísandi ljón sem alveg smellpassar og ekki spillir fyrir að hún á sama afmælisdag og Madonna sem ég býst við að tengist fagurkeranum í henni líka,“ segir Áslaug og skálar við Ölbu í dýrindis súkkulaðisúpu.

Súkkulaðisleikjóar sem er einfalt að útbúa og skreyta með hnetum, þurrkuðum ávöxtum eða hverju sem hugurinn girnist.

„Nafnið Alba þýðir sólarupprás á ítölsku. Hún fær því iðulega drykki í mörgum litum sólarupprásarinnar, allt frá ljósgulu yfir í fjólublátt. Barnið espar upp ömmuna og vill hafa allar máltíðir „miniature“,“ segir Áslaug og skellihlær.

„Alba veit að amma geymir servíettur frá Grand Hotel Alba síðan forðum daga og ég vona að við eigum eftir að fara þangað aftur saman til að borða besta súkkulaði og heslihnetur í heimi. Súkkulaði er svo mikil ofurfæða og hamingjugjafi og ég get verið óttalaus um að barnið fái ekki sykursjokk því sykurinn er í lágmarki.

Jólasveinar setja skemmtilegan svip á veisluborð smáfólksins um jól.

„Nafnið Alba þýðir sólarupprás á ítölsku. Hún fær því iðulega drykki í mörgum litum sólarupprásarinnar, allt frá ljósgulu yfir í fjólublátt. Barnið espar upp ömmuna og vill hafa allar máltíðir „miniature“,“ segir Áslaug og skellihlær.

„Alba veit að amma geymir servíettur frá Grand Hotel Alba síðan forðum daga og ég vona að við eigum eftir að fara þangað aftur saman til að borða besta súkkulaði og heslihnetur í heimi. Súkkulaði er svo mikil ofurfæða og hamingjugjafi og ég get verið óttalaus um að barnið fái ekki sykursjokk því sykurinn er í lágmarki.

Súkkulaðifondú er sparilegur og spennandi valkostur á veisluborðum og dásamlega gott að dýfa þurrkuðum og ferskum ávöxtum í heitt súkkulaðið.

Hér eru nokkrar hugmyndir fyrir veisluhald frá Áslaugu og Ölbu:

Súkkulaðiflæðingur

Hnetusmjör eða súkkulaðiflæðing köllum við þetta góða viðbit sem smellpassar á pönnukökur sem við erum iðnar við að baka. Alba er orðin frábær pönnukökustjóri og ekki spillir að amman kann að flippa þeim á pönnunni eins og Lína Langsokkur!

200 g ristaðar heslihnetur maukaðar með 100 g sykri

450 g suðusúkkulaði, brætt og bætt við 100 g bráðið smjör ásamt 2 dl rjóma.

Hnetublandan hrærð út í og geymt í krukkum í ísskáp.

Birtan og snjórinn í desember býður upp á útiveislur í góðu veðri. Ítölsk panettone-jólaterta skreytt með rós er lokkandi með heitum drykk.

Súkkulaðisúpa með rjóma

Hér fékk sparistellið að njóta sín en þægilegast er að sötra súpuna úr skál og er það mun meiri stemning.

300 g heslihnetur, vel þeyttar í 7 dl af vatni.

300 g brætt suðusúkkulaði bætt út í ásamt slatta af vanillu, kardimommum og appelsínuberki.

Fínt er að bæta mjólk út í súpuna til kælingar í lokin en þykktin ræðst eftir smekk.

Toppað með vænni slettu af þeyttum rjóma.

Hver stenst svo falleg marsipandýr- og ávexti? Örugglega ekki börn í jólaskapi.

Súkkulaði fondú

Súkkulaði fondú okkar Ölbu er einstaklega gott og auðvelt. Við skemmtum okkur við að dýfa bæði þurrkuðum og ferskum ávöxtum ofan í súkkulaðið en á þessum árstíma er sérlega ljúffengt að dýfa Panettone og Amarettí-kökum bæði í fondúið og súpuna.

Súkkulaði má líka hella yfir trépinna eins og sleikjó og toppa með góðgæti.

Áslaug og Alba kunna þá list betur en margir að leggja fallega á borð.
Heitt súkkulaði með rjóma og franskar makkarónur með kertaljósi og skrauti.