Mila fæddist í Chernivtsi í Úkraínu 14. ágúst 1983 og á einn eldri bróður. Þegar Mila var sjö ára ákváðu foreldrar hennar að flytja til Los Angeles svo börnin ættu sér bjartari framtíð en í gömlu Sovétríkjunum, en sú ákvörðun kostaði þau góð störf heima og háskólagráður sem ekki voru metnar vestanhafs.

Á öðrum degi nýrrar tilveru í Los Angeles hóf Mila nám við Rosewood-grunnskólann og kunni þá einungis móðurmál sitt, rússnesku. Hún segist hafa grátið daglega fyrsta skólaárið því hún skildi hvorki tungumálið, menninguna né fólkið.

Mila var níu ára þegar pabbi hennar skráði hana í leiklistartíma hjá Beverly Hills Studios. Þar hitti hún Susan Curtis sem seinna varð umboðsmaður hennar. Eftir sína fyrstu áheyrnarprufu fékk Mila hlutverk í Barbie-sjónvarpsauglýsingu en fyrsta hlutverk í sjónvarpsþætti fékk Mila í Days of our lives árið 1994. Nokkrum mánuðum síðan lék hún lítið hlutverk í Strandvörðum, þá ellefu ára.

Ástir tókust með Milu og Ashton Kucher sem giftu sig sumarið 2015.

Skrökvaði um aldur sinn

Mila varð heimsfræg í hlutverki Jackie Burkhart í sjónvarpsþáttunum vinsælu That ´70s Show, sem sýndir voru á árunum 1998 til 2006. Í aðdraganda þáttanna var þess krafist að leikarar sem sæktu áheyrnarprufur væru orðnir átján ára en Mila, sem þá var fjórtán ára, sagðist alveg að verða átján. Þótt upp hafi komist um skrökið var Mila talin sú langbesta fyrir hlutverkið og hlaut fyrir leik sinn verðlaun sem besta unga leikkonan í gamanþáttum árin 1999 og 2000. Mila léði Meg Griffin einnig rödd sína í teiknimyndaseríunum Family Guy.

Mila með samleikurum sínum í That ´70s Show, þá nýorðin fjórtán ára.

Fyrsta stóra kvikmyndahlutverkinu landaði Mila árið 2008, þegar hún lék Rachel í rómantísku gamanmyndinni Forgetting Sarah Marshall. Hún hlaut svo mikið lof fyrir hlutverk sitt í kvikmyndinni Black Swan, meðal annars Marcello Mastroianni-verðlaunin sem besta unga leikkonan og tilnefningar til Golden Globe sem besta leikkonan í aukahlutverki. Meðal annarra vinsælla mynda Milu Kunis má nefna Ted á móti Mark Wahlberg, Friends with benefits á móti Justin Timberlake, Book of Eli á móti Denzel Washington og Bad Moms.

Með grænt og brúnt auga

Sjarmi Milu Kunis er óumdeildur. Hún hefur í áraraðir vermt lista yfir fegurstu og kynþokkafyllstu konur heims, en áður en að því kom lét hún hafa þetta eftir sér: „Maður verður að byggja ferilinn á einhverju öðru en því að vera FHM Topp 100-stelpan. Útlitið lætur á sjá einn daginn og hvað stendur þá eftir?“ Seinna, þegar hvert karlatímaritið á fætur öðru setti hana á lista yfir þokkafyllstu konur heims, sagði Mila: „Það eina sem ég get sagt er að ég er upp með mér að vera talin sexí.“

Svona lítur Mila Kunis út í dag, geislandi fögur á Sundance-kvikmyndahátíðinni í Utah fyrr á árinu. MYNDIR/GETTY

Stíll Milu er kvenlegur. Hún var andlit Christian Dior vorið 2013 og sendiherra Gemfields sem framleiðir lúxusvarning úr eðalsteinum.

Hún þjáðist af krónískri lithimnubólgu árið 2011 sem olli tímabundinni blindu en með skurðaðgerð var hægt að komast fyrir sjúkdóminn. Eftir stendur að vinstra augað er brúnt og það hægra grænt.

Leikkonan átti í áralöngu ástarsambandi við barnastjörnuna Macaulay Culkin á árunum 2002 til 2011. Hún byrjaði að hitta samleikara sinn, Aston Kucher úr That ´70s Show árið á eftir en þau gengu í hjónaband 2015 og eiga saman tvö börn.

Mila var árum saman í ástarsambandi með Macaulay Culkin.