Kólumbíska Poppstjarnan Shakira varð fyrir árás tveggja villisvína í gær er hún var í almenningsgarði í Barcelona, ásamt átta ára gömlu syni sínum. Hún segir að dýrin hafi ráðist á sig, tekið tösku hennar og síðan látið sig hverfa inn í skóg í garðinum.
Söngkonan greindi frá atvikinu á Instagram. Þar sýndi hún illa farna töskuna og sagði: „Sjáið hvernig tvö villisvín sem réðust á mig í garðinum fóru með veskið mitt.“
„Þau voru á leið í skóginn með töskuna mína með farsímanum mínum. Þau hafa eyðilagt allt,“ sagði söngkonan. Í myndskeiðinu sést hún þá snúa sér að syni sínum Milan, sem hún á með fótboltamanninum Gerard Piqué, og sagði: „Milan segðu sannleikann. Segðu frá því hvernig mamma þín bauð villisvínunum birginn.“
Ekki kom fram í máli hennar að hún eða sonur hennar hefðu særst en villisvín geta borið fjöldann allan af sjúkdómum.
Shakira er nýjasta, og sennilega frægasta, fórnarlamb árásargjarnra villisvína sem herjað hafa á íbúa Barcelona á undanförnum árum. Þau hafa ráðist gegn dýrum, stöðvað umferð og hlaupið á bíla í borginni. Árið 2013 reyndi lögreglumaður að stöðva eitt slíkt og skaut á það en hitti samstarfsfélaga sinn.
