„Mér finnst jólaþrif as in að taka allt í nefið svo úrelt vitleysa,“ segir áhrifavaldurinn og þrifdrottningin Sólrún Diego. En henni þykir betra að viðhalda heimilinu allan ársins hring til þess að gera lítið í einu, en ekki ráðast í of stór verkefni fyrir jólin.

„Ég hef nokkur jól verið mjög buguð og með allt of mikið á minni könnu, og ekki gert nein jólaþrif,“ segir Sólrún, sem fann engan mun á Aðfangadegi, þrátt fyrir að hafa látið tuskuna og edikið vera.

Hún segir það mikilvægt að minna sig á að huga að því sem mestu máli skiptir. „Samvera er það sem skiptir mig mestu máli og ég mæli með því að hugsa til síðustu ára, og skrifa niður hvað það var sem situr eftir og vekur upp góðar minningar, og einblína á það.“

Sólrún er fullviss um að hreint heimili, fín föt og gjafir eru ekki efst á þeim lista.

Það kemur eflaust einhverjum á óvart að sjálf Sólrún Diego taki ekki allt í nefið fyrir jólin, þar sem hún er þekkt fyrir afar góð þrif ráð, hvort sem um föt, ofna, sófa er að ræða.

Mynd/Instagram
Mynd/Instagram