Matjurtakassar Margrétar eru algjörlega hennar hugmynd og hönnun, en þeir áttu bara að vera til einkanota. En vinir hennar og vandamenn voru svo hrifnir af kössunum að hún smíðaði nokkra fleiri fyrir þá og ákvað að deila myndum af þeim á Facebook. Hún átti ekki von á þeim viðbrögðum sem hún fékk.

„Þetta hófst þannig að áður en COVID kom sagði ég upp vinnunni minni. Ég vissi náttúrlega ekkert að COVID væri að koma, en ég er með fyrirtæki sem heitir Verum góð og hef verið að halda fyrirlestra og námskeið tengt því. En svo var allt í einu komið COVID og ég var þar af leiðandi ekki að halda neina fyrirlestra. Ég var þess vegna bara að dunda mér við að smíða kassana. Það var svo algjör skyndihugdetta að pósta þeim á Facebook og það endaði á að ég smíðaði 68 kassa á sex vikum,“ segir Margrét.

„Ég hef lengi verið að smíða sem hobbí. Ég hef mjög gaman af því, ég hef smíðað skjólveggi og palla og parketlagt og ýmislegt fleira smíðatengt svo ég kunni að smíða áður en ég byrjaði á þessu,“ segir Margrét.

„Ég hef fengið svo mikið af jákvæðum athugasemdum að ég er búin að ákveða að ég ætla að halda áfram með þetta verkefni. Fólki er velkomið að finna mig á Facebook og senda skilaboð, ef það vill kassa. En svo er heimasíða í vinnslu fyrir fyrirtækið og þá mun ég auglýsa þá þar.“

Margrét byrjaði að smíða kassana til einkanota og fyrir nokkra vini.

Dásamlegt að vera úti að smíða

Kassana hefur Margrét smíðað úti á veröndinni hjá sér, en hún segir það hafa verið algjörlega dásamlegt í vor og núna í sumar, að vera heima að smíða.

„Kassarnir eru í ákveðnum stærðum, en fólk hefur líka gert sérpöntun hjá mér, til dæmis ef það vill að kassarnir passi í ákveðið rými. Þess vegna hef ég búið til svalakassa sem ég var ekki með í upphafi,“ útskýrir Margrét.

„Það sem er gott við kassana er að inni í þeim er sterkur og góður jarðvegsdúkur og yfir þeim er plastdúkur úr plasti sem er notað í alvöru gróðurhús. Þetta er alveg níðsterkt. Ég veit það sjálf því ég er með svona kassa hjá mér og ég geymi þá úti allt árið. Út af jarðvegsdúknum kemst engin óværa í þá eins og sniglar eða annað og moldin helst mjög góð.“

Minnsta kassann kallar Margrét kryddkassa því hún segir hann mjög hentugan til að rækta kryddplöntur, en hann er samt nógu djúpur til að hægt sé að rækta í honum salatblöð eða kál.

„Stærri kassarnir eru það djúpir að það er hægt að vera með kartöflur í þeim. En það gera það ekki margir. Þú færð ekki margar kartöflur úr einum kassa,“ segir Margrét.

„Það er mjög gott að rækta í þessum kössum. Þeir eru sterkir og góðir, svo fólk þarf ekki að hafa áhyggjur af að geyma þá úti. Ef fólk vill þá bæsa ég þá líka, svo þeir eru bæði huggulegir og endast.“

Á kössunum er áfast lok úr sterku plasti.