Á sumrin finnst Alberti Eiríkssyni, matreiðslumanni og sælkera, gaman að bjóða upp á létta og sumarlega smárétti í stað þess að vera með þungan mat. Albert heldur úti matarbloggsíðunni Albert eldar og er iðinn við að setja þar inn uppskriftir fyrir öll tilefni sem henta fyrir allar árstíðir.

„Matarhefðir og venjur okkar Bergþórs eru frekar í léttari kantinum á sumrin. Við borðum mikið grænmeti og ávexti og höfum í raun tekið meðvitaða ákvörðun um það. Við erum engir sérstakir grillkarlar, við erum mun meira fyrir hægeldaðan mat,“ segir Albert. En þeir eiga það til að skella einhverju góðgæti, til dæmis lambakjöti, í ofninn og baka á vægum hita meðan þeir bregða sér í nokkurra klukkutíma göngu. „Síðan er hækkað í hitanum þegar heim kemur til að taka lokahnykkinn á steikingunni og góðgætið tilbúið eftir stutta stund, eftir fullkomna eldun eftir okkar smekk.“

Eins og Albert nefnir kallar hungrið oft eftir öfluga hreyfingu og þá er gott að koma heim og finna matarilminn. „Eftir góða hreyfingu er ekkert betra en að fá góða máltíð og þá er tekið hraustlega til matarins.“

Lax er svo góður og hægt er að leika sér mikið með hann í matargerðinni. Hann er líka einstaklega góður í kalda rétti. fréttalbaðið/anton brink

Vita fátt skemmtilegra en að halda veislur

Veislur eiga líka hug og hjörtu þeirra Alberts og Bergþórs og þeir vita fátt skemmtilegra en að halda veislu og bjóða hópum heim. „Fyrir mörgum árum hafði samband við okkur kona og spurði hvort hún mætti ekki koma með vinnuhópinn sinn til okkar í veislu og við tókum okkur smá umhugsunartíma en létum svo slag standa. Það má í raun segja að svona hafi þetta byrjað, við hreinlega bara lentum í þessu, að halda veislur fyrir hópa,“ segir Albert og bætir því jafnframt við að þetta sé ávallt jafn gaman og gefandi.

„Þessi veisluhöld spurðust út á sínum tíma og síðan hefur þetta undið upp á sig í áranna rás.“

Albert segir að um sé að ræða alls konar veislur.

„Það er mikið um gæsaveislur, steggjaveislur, afmæli, þemaveislur og alls konar „surprise“-veislur fyrir þá sem vilja koma og gera sér glaðan dag, svo dæmi séu tekin.“

Í veislunum er boðið upp á ýmiss konar veitingar eftir hvaða tilefni eru og oft er farið í samkvæmisleiki sem ávallt vekja mikla lukku.

Serbl_Myndatexti:Laxasmáréttir geta verið margvíslegir og mjög fallegir.

Íslenska matarhefðir fyrir ferðamenn

Einnig hafa Albert og Bergþór tekið á móti erlendum ferðamönnum heim og boðið til veislu. „Þá erum við að taka fyrir íslenskar matarhefðir og siði, sýna þeim og bjóða upp á séríslenskan mat eins sykurbrúnaðar kartöflur, síld, heimalagað rabarbarapæ og sultur úr uppskeru sumarsins svo dæmi séu tekin. Það er ávallt vinsælt hjá ferðamanninum að kynnast íslenskum matarhefðum.“

Tími smáréttanna á sumrin

Albert hefur sérstaklega gaman af því að dunda sér í eldhúsinu og búa til ýmiss konar smárétti sem tilvalið er að bjóða upp á úti á pallinum eða í garðveislunni yfir sumartímann. Hann velur stundum ákveðið þema og að þessu sinni ákvað Albert að bjóða upp á smárétti með laxaþema. „Lax er svo góður og hægt er að leika sér mikið með hann í matargerðinni. Hann er líka einstaklega góður í kalda rétti í ýmsum formum og hefur skírskotun í íslenskt sumar.“

Það getur verið kostur ef tíminn er takmarkaður að velja veitingar sem hægt er að undirbúa með góðum fyrirvara að mati Alberts. „Rúllur með reyktum eða gröfnum laxi og rjómaostafyllingu eru dæmi um þetta. Laxarúllurnar er gott að útbúa daginn áður og frysta. Best er að skera þær niður hálffrosnar með heitum hníf, látið heitt vatn renna á hann milli skurða. Rúllur með gröfnum laxi eru ekki síðri en þær með reykta laxinum.“

Laxarúlla á hveitikímköku.

Laxarúlla á gúrkusneið

Leggið filmu á borð. Skerið laxinn í sneiðar, ekki of þunnar. Smyrjið með mjúkum rjómaosti, rúllið upp og frystið.

Lefsusamlokur

Smyrjið lefsur með majónesi eða sýrðum rjóma, raðið laxasneiðum á og leggið aðra lefsu yfir. Skerið niður.

Laxarúlla á hveitikímköku

1 bolli vatn

1 bolli hveitikím

¼ tsk. salt

1 tsk. rúgmjöl

Mótið litlar kökur og bakið við 175 °C í um 30 mín. Látið kólna. Leggið filmu á borð. Skerið reyktan eða grafinn lax í sneiðar (ekki of þunnar). Smyrjið með mjúkum rjómaosti, rúllið upp og frystið.

Gráðaostalaxasalat á gúrkusneið

100 g reyktur lax

½ box rjómaostur

2 msk. gráðaostur að eigin vali

Setjið reyktan lax og rjómaost í matvinnsluvél. Myljið gráðaost saman við, blandið með sleif. Mótið kúlur og setjið ofan á gúrkusneið.

Laxarúlla á gúrkusneið.Serbl_Myndatexti: