Þótt ekki verði haldið til útlanda á þessu sumri er svo ótrúlega margt skemmtilegt hægt að gera innanlands. Sumarbústaðaferð með fjölskyldunni með tilheyrandi grillveislu, eða gönguferðum í náttúrunni í fallegu veðri. Það er slakandi að vera í rólegheitunum í íslenskri sveit. Með breyttu viðhorfi er hægt að ná bata gegn streitu í sumarfríinu og forðast með því álagstengda sjúkdóma.

Nútíma fjölskyldurútína kallar fram streitu í daglegu lífi. Það er því afar mikilvægt að nota tímann í fríinu til að slaka á. Það er ágætt ráð að taka af sér úrið og slökkva á símanum. Sinntu frekar áhugamálum eins og lestri góðra bóka, að teikna, huga að plöntum í garðinum, fara í sund eða göngu.

Um að gera að leika sér og gera eitthvað skemmtilegt.

Samfélagsmiðlar og alls kyns öpp geta verið mjög stressandi. Ef okkur líður vel, erum glöð í bragði og njótum frísins, gefur það um leið orku og andlega hugleiðslu. Þegar fólk tekur sér frí frá samfélagsmiðlum, til dæmis í tvær vikur, getur það orsakað stress yfir að verið sé að missa af einhverju spennandi. Þess vegna er betra að minnka notkunina eftir fyrir fram ákveðnum reglum sem maður setur sér.

Fjölskyldusamvera er nauðsynleg í sumarfríum. Hjón ættu engu að síður að reyna að gefa sér dag saman án barna. Það bætir sambandið, eftir því sem sænskur ráðgjafi segir við Expressen. Skilnaðir eru algengastir í september og október eftir „erfitt“ sumarfrí. Þar sem utanlandsferðir eru ekki á dagskrá er ekki úr vegi að taka til höndum við það sem setið hefur á hakanum heima. Hjón geta unnið að því saman.

Grillveisla með þínum nánustu er alltaf hin besta skemmtun.

Þeir sem eru undir miklu álagi í vinnunni ættu að huga að hreyfingu í sumarfríinu. Þá gefst loks tími til að taka sig aðeins í gegn. Hreyfing getur verið margvísleg. Má þar nefna hjólatúr með fjölskyldunni, ferð í sund eða á aðra baðstaði, eða bara að fara í langan göngutúr með stoppi á kaffihúsi. Auðveld fjallganga er sömuleiðis skemmtileg fyrir alla, eða veiði- ferð í nálægt vatn. Á góðviðrisdögum er líka frábært að borða morgunmatinn utandyra og gera eitthvað spennandi, eins og að baka pönnukökur eða fara í bakaríið og leyfa sér að kaupa góðgæti sem þar er boðið upp á. Það er um að gera að njóta hvers dags án álags og bæta heilsuna um leið.