María Gomez lífsstíls- og matarbloggari með meiru sem heldur úti bloggsíðunni paz.is er afar fær í því að töfra fram rétti fyrir börnin sín sem eru bæði hollir og góðir með fjölbreyttu næringargildi. María deilir hér með okkur pastarétti sem krakkarnir hennar elska.

FBL Krakkapastað hennar Ölbu María G 3.jpeg

Girnilegur pastaréttur sem börnin elska./Ljósmyndir María Gomez.

„Alba dóttir mín elskar slaufupasta með ostasósu, eða fiðrildapasta eins og hún kallar það. Hún og bræður hennar eru samt smá gikkir þegar kemur að elduðu grænmeti, en það má helst ekki sjást neitt slíkt í matnum. Til að fá góða bragðið í pastaréttinn, sem sveppir og blaðlaukur gefa, tek ég til þess ráðs að mauka það í blandara. Ykkur gæti þótt það kannski skrítið en þannig næ ég að bæta grænmeti út í sem gefur rétta bragðið án þess að þau verði var við neitt og eykur enn á hollustugildið. Ég mæli með að þið prófið að gera það líka ef þið eigið gikki eins og ég þegar kemur að elduðu grænmeti,“segir María og bætir því jafnframt við að með þessu móti eruð séu þið líka að venja bragðlauka barnsins á bragðið af sveppum og blaðlauk án þess að þau fatti það. Nú er bara að prófa þetta snilldar pastarétt, Krakkapastað hennar Ölbu, fyrir krakkana.

FBL Krakkapastað hennar Ölub María G 4.jpeg

Krakkapastað hennar Ölbu

300 g De cecco pastaslaufur

80 g smátt skornir sveppir

60 g blaðlaukur smátt skorin

½ dl matreiðslurjómi (fyrir grænmetið)

1 msk. ólífuolía

150 g silkiskorin skinka

1/3 tsk. þurrkað timian

salt og pipar

1 dós skinkumyrja

1,5 dl matreiðslurjómi

2 tsk. rifinn parmesan ostur

  1. Setjið vatn í pott og saltið vel (næstum eins og sjóvatn) og látið suðuna koma upp og bætið þá pastanu út í og sjóðið í 11-13 mínútur.
  2. Á meðan setjið þá sveppi og blaðlauk í matvinnsluvél eða blandara en skerið það aðeins smærra niður fyrst og bætið 1/2 dl matreiðslurjóma út í og maukið þar til er orðið eins og hummus eða kæfa.
  3. Setjið svo olíu á pönnu og setjið smátt skorna silkiskinku út á og steikið í smá stund.
  4. Hellið svo sveppagumsinu yfir skinkuna og saltið og piprið og látið stikna eins og í 3-5 mínútur við miðlunghita (ykkur gæti þótt þetta líta skringilega út á þessu stigi eða smá eins og túnfiskur en það lagast á eftir).
  5. Setjið svo næst skinkumyrjuna út á ásamt 1,5 dl matreiðlsurjóma, timían og parmesan ostinum og látið sjóða þar til allt er vel brætt saman og orðin þykk og silkumjúk ostasósa.
  6. Bætið þá pastaslaufunum saman við sósuna og hrærið öllu vel saman og leyfið því að sjóða í eins og 2 mínútur saman.
  7. Berið fram með hvítlauksbrauði og fersku grænmeti.

Njótið vel.