Við mæðgurnar njótum þess að verja aðventunni saman ásamt fjölskyldunni. Hver jól erum við með ákveðið jólaþema sem breytist ár frá ári. Núna í ár er þemað grænar greinar, náttúrulegir jólapakkar, þar sem litir og form er sótt í náttúruna.“ Ein af uppáhaldsgæðastundum þeirra mæðgna er að pakka inn jólapökkunum og skreyta. „Hefðir og siðir skipta okkur miklu máli. Við leggjum mikið upp úr því að pakkarnir séu fallegir og innihaldið kærleiksríkt.“ Það er heilög stund hjá þeim mæðgum og ræður einfaldleikinn ríkjum þegar kemur að því að pakka inn. „Í ár er eru það bastbönd, hvítur pappír og brúnir pokar sem prýða jólapakkana og tóna vel við náttúrulitina,“ segja þær mæðgur og elska að nostra við hvert smáatriði. „Okkar gæðastund er tebolli, innpökkun, kertaljós og smákökubakstur. Hátíðin fyrir okkur nær hámarki sínu í miðnæturmessu í Hallgrímskirkju á aðfangadagskvöld jóla.“

Stílhreint og fallegt heimili.

Greinarnar og jólatréð sótt í sveitina Einnig hafa þær Stella og Inga Bryndís gaman af því að setja saman jólakransa. „Jólakransarnir okkar í ár eru handofnir úr grófu ullartvídi og grófriffluðu bómullarflaueli. Síðan eru greinarnar og jólatréð sótt í sveitina og skreytingarnar eru einfaldar þar sem greinarnar fá að njóta sín,“ segja þær mæðgur

Bastbönd, hvítur pappír og brúnir pokar passa vel við hvít leirker og jólakúlurnar sem eru handofnar.

Jólin eru hið eðlilega ástand mannsins „Við höldum mikið upp á aðventuna og aðdraganda jóla. Þessi einstaklega góða appelsínukaka með jólaívafi, sem okkur langar að deila með lesendum, gleður okkur alltaf jafn mikið og tendrar jólastemninguna í hjarta okkar. Kakan á uppruna sinn að rekja til Frakklands og Frakkar kunna að baka einfaldar, gómsætar kökur sem bragð er af. Það var góður maður sem eitt sinn sagði: „Jólin eru hið eðlilega ástand mannsins.“ Þannig ætti okkur öllum að líða.“

Látlaus kakan laðar augað að, Sesarkaka með jólaívafi.

Sesar-appelsínukaka með jólaívafi

150 g smjör

2 dl hrásykur

2 egg

½ dl safi úr appelsínu

Rifinn börkur af einni appelsínu

2 dl fínmalað spelt

1 dl möndlumjöl

1 tsk. lyftiduft

1 tsk. vanilluduft

Byrjið á því að hita ofninn í 175 °C. Smjör og hrásykur þeytt saman. Einu eggi í senn bætt út í. Þurrefnunum bætt út í. Því næst er appelsínusafanum og berkinum bætt saman við. Að lokum er allt hrært saman í stutta stund og skal passa að hræra ekki of lengi svo kakan verði ekki seig. Deiginu hellt í meðalstórt, kringlótt form og sett inn í ofn. Bakið við 175 °C í um það bil 40 mínútur. Berið fram á einfaldan hátt og hægt er að skreyta kökuna með grænum greinum að eigin vali.