Til að taka þátt þarf að samþykkja áskorun, taka mynd og setja á samfélagsmiðla með myllumerkjunum #flakkogflandur og #skátarnir.

Áskoranirnar eru miserfiðar og miserfitt að ná fullkláruðu verkefni á mynd, en finna má eitthvað fyrir alla. Skátarnir treysta því að allir sýni heiðarleika við að klára einstakar áskoranir og senda þær inn. Allir sem klára að minnta kosti fimm áskoranir fá þátttökuverðlaun og þau sem klára þær allar fá sérstaka viðurkenningu, en munum að skátar eru heiðarlegir.

Gakktu á fimm fjöll

Á landinu eru ótal fjöll sem gaman er að klífa. Skemmtilegast er að fara á fjöll sem þú hefur ekki klifið áður, fara nýja leið upp fjall sem þú þekkir vel eða reyna að bæta tímann frá því þú gekkst á það síðast. Klifur verður sífellt vinsælla enda góð og spennandi líkamsrækt. Til að ljúka áskoruninni þarf að klifra samtals 50 metra og læra að þræða áttuhnút. Gott er að skoða klifur.is til að finna upplýsingar um klifurleiðir á víð og dreif um Ísland og hægt er að klifra inni á Klifurloftinu, Smiðjuloftinu og Klifurfelli.

Plokkaðu rusl

Fylltu heilan svartan ruslapoka af rusli úr umhverfinu, til dæmis í hverfinu þínu eða úti á landi í sumar. Til dæmis er hægt að skella í eitt Tiktok af sér að plokka rusl.

Ferðastu 200 km á eigin vegum

Það má hjóla, synda, ganga, hlaupa, róa og fleira til að ná þessum kílómetrum, en ekki má nota tæki knúin annarri orku en þinni eigin.

Tíu nætur í tjaldi

Sofa þarf samtals tíu nætur í tjaldi, en þær þurfa ekki endilega að vera allar í röð.

Sofðu undir berum himni

Fátt er betra en að sofna undir stjörnunum eða miðnætursólinni og anda að sér fersku lofti alla nóttina, þegar ekki rignir.

Syntu í sjónum

Á heitum degi er fátt meira hressandi en að skella sér í kaldan sjóinn og synda smá.

Ráðleggingar fyrir byrjendur í sjósundi eru á nautholsvik.is.

Eldamennska í náttúrunni

Til að klára þessa áskorun þarf að elda minnst þriggja rétta máltíð úti í náttúrunni og þarf máltíðin að innihalda minnst tvö hráefni sem finnast þar.

Gætið fyllstu varúðar með opinn eld úti og í kringum fólk og passið að það megi örugglega borða það sem þið notið til átu úr náttúrunni.

Prófaðu nýja íþrótt

Margir æfa íþrótt en eiga eftir að prófa aðrar. Uppástungur um íþróttir eru til dæmis sjálfsvörn, CrossFit, fótbolti, handbolti, körfubolti, dans (tiktok), blak, lyftingar, kajak, ruðningur, badminton, borðtennis, spretthlaup, golf, hjólaskautar, hjólabretti og keila.

Syntu í stöðuvatni

Tilvalið er að taka sundsprett í stöðuvatni til að hressa sig við, en gætið varúðar og þess að allir séu syndir.

Sigldu bát eða fleka

Það er alltaf gaman að skella sér út á vatn og blotna smá. Hægt er að kíkja á bátaleiguna á Úlfljótsvatni eða byggja sér fleka.

Passið bara að allir séu vel syndir áður en flekanum er siglt á vatni.

Heimild: skatarnir.is