Hljómsveitin Tómas Jónsson, með Tómas Jónsson sjálfan í fararbroddi, heldur hljómleika í beinu streymi frá Mengi kl. 20.00 á morgun. Hljómsveitin leikur lög af nýju plötunni Tómas Jónsson 3, og fyrstu plötu sveitarinnar Tómas Jónsson frá árinu 2016.

Hljómsveitina skipa:

Guðmundur Óskar Guðmundsson: Rafbassi og bassahljóðgervill

Magnús Trygvason Eliassen: Trommur

Magnús Jóhann Ragnarsson: Hljóðgervlar

Rögnvaldur Borgþórsson: Rafgítar og hljóðgervill

Tómas Jónsson: Hljómborð og hljóðgervlar

Tómas spilaði á Megasartónleikum Möggu Stínu í febrúar. MYND/SIGTRYGGUR ARI

Á nýju plötunni 3, sem kom út í dag á 27 ára afmæli Tómasar, eru níu lög. Lögin eru instrúmental og eru allt frá því að vera rólegt synthapopp, nýklassík og upp í harða elektró-industrial tónlist.

„Ég stefni á tónleikahald eftir samkomubann með einum eða öðrum hætti. Þess vegna lít ég ekki á streymistónleikana sem eiginlega útgáfutónleika þó að þeir séu vissulega beintengdir útgáfunni,“ segir Tómas, en hann lofar áhorfendum góðri skemmtun, hafi þeir á annað borð gaman af músík.

Tómas er píanó- og hljómborðsleikari sem býr ásamt fjölskyldu sinni í Þorlákshöfn. Hann hefur leikið með mörgum af bestu og þekktustu tónlistarmönnum Íslands en hann hóf ungur að spila. Hann hefur ferðast um heiminn með mönnum eins og Ásgeiri Trausta og Júníusi Meyvant auk þess að ferðast með sinni eigin hljómsveit AdHd.

Nýja platan ber nafnið 3. Plötuumslagið hannaði Viktor Weishappel.

Tómas samdi sjálfur og útfærði alla tónlistina á nýju plötunni. „En hljómsveitin spilar inn á upptöku á þeim stöðum sem það á við. Þegar tónlistarmenn spila inn á upptökur er það þó langoftast þannig að þeir setja sjálfir sinn stíl og sitt „sánd“ og hugmyndir í músíkina,“ útskýrir Tómas.

Platan var að mestu tekin upp á Íslandi en líka í rútu á ferð um Ameríku og Evrópu. „Ég var á tónleikaferðalagi með Ásgeiri Trausta og við vorum með stúdíó aftast í rútunni með ótrúlega fínum græjum. Það var þó oft pínulítið flókið að taka upp því rútan var yfirleitt á ferð með tilheyrandi hristingi og hávaða,“ segir Tómas spurður að því hvernig stóð á því að hluti plötunnar var tekinn upp í rútu.

Tónleikarnir á morgun eru hluti af tónleikaröðinni Tómamengi, sem Mengi stendur fyrir á netinu á meðan samkomubannið varir. Frjáls framlög eru á viðburðina sem renna að meirihluta til listamannanna samkvæmt tilkynningu frá Mengi.


Hægt er að greiða framlög:

Með því að hringja í 901-7111 (1.000 krónur)

Með millifærslu á Kass í númerið 865-3644

Með PayPal millifærslu á payment@mengi.net

Hefðbundið miðaverð á tónleika í Mengi er 2.000 krónur en listamennirnir og Mengi þakka kærlega fyrir öll framlög. Hægt verður að fylgjast með streyminu á mengi.is og visir.is.