Kínamúrinn var byggður á Ming-tímanum sem spannar tímabilið frá 14. til 16. aldar. Hann er 6.350 kílómetra langur virkisveggur sem var reistur til að vernda Kína gegn innrásum mongólskra og tyrkneskra ættflokka en þegar mest var stóð rúmlega ein milljón hermanna vörð á múrnum.

Hin forna borg Petra í Jórdaníu var greipt og handgrafin í stein og kletta.

Petra í Jórdaníu er ægifögur forn borg sem var byggð úr klettum og steini í kringum 1200. Hún naut mikillar virðingar fyrir háþróaða menningu, stórkostlegar byggingar og einstakt vatnsveitukerfi en var öllum gleymd á 16. öld eða þar til árið 1812 að hún fannst á ný.

Styttan af Jesú Kristi í Brasilíu er 38 metra há og gnæfir yfir borginni Ríó de Janeiro á fjallinu Corcovado.

Styttan af Jesú Kristi er eitt þekktasta kennileiti Brasilíu, alls 38 metra há og talin vera stærsta höggmynd í art deco-stíl í heiminum. Styttan var vígð árið 1931 og gnæfir yfir borginni Ríó de Janeiro á tindi fjallsins Corcovado.

Inkaborgina Machu Picchu í Perú er undur að skoða.

Machu Picchu, borg Inkanna í Perú, er talin hafa verið reist fyrir Pachacuti, keisara Inkanna, í kringum 1450. Borgin var yfirgefin hundrað árum seinna eftir landvinninga Spánverja.

Kínamúrinn er feiknarlega stórt hernaðarmannvirki.

Colosseum er stærsta hringleikahúsið sem byggt var í Rómaveldi. Það gat tekið 70 þúsund manns í sæti og var notað fyrir blóðuga bardaga skylmingaþræla og aðrar svipaðar skemmtanir. Framkvæmdir hófust árið 70 eftir Krist og var leikhúsið opnað tíu árum síðar.

Hringleikahúsið Colosseum í Róm tók 70.000 manns.

Chichen Itza er gömul Maya-borg í Yucatán í Mexíkó og ein sú stærsta frá tímum Mayaindjána. Talið er að borgin sé meira en 1500 ára gömul og má sjá marga stíla arkitektúrs í borginni sem og píramída.

Taj Mahal á Indlandi þykir ein fegursta bygging heims.

Taj Mahal er grafhýsi í borginni Agra á Norður-Indlandi, eitt af þekktustu verkum íslamskrar byggingarlistar og eitt frægasta mannvirki heims. Það var reist fyrir keisarann Shah Jahan til minningar um þriðju eiginkonu hans sem lést af barnsförum. Talið er að yfir 20 þúsund verkamenn og 1.000 fílar hafi komið að efnisflutningum og byggingu Taj Mahal sem var reist úr hvítum marmara og verðmætum steinum á árunum 1632 til 1643.