Sýningin Fuglar verður opnuð í dag, laugardag, í Gallery Porti, Laugavegi 32 í Reykjavík. Þar sýnir Sæþór Örn Ásmundsson olíumálverk og verk unnin með blandaðri tækni sem eiga það sameiginlegt að sýna ýmsar tegundir af fuglum. „Fuglar eru eitthvað sem ég tók lítið eftir sem krakki en síðustu ár, sennilega með auknum aldri og þroska, hef ég heillast meira af þeim og sé núna fugla út um allar koppagrundir. Eftir að fjölskyldan fór að dvelja mikið á sumrin á Vestfjörðunum hef ég líka heillast meir og meir af náttúrunni og sérstaklega af fuglum. Í verkunum á sýningunni er ég að takast á við þessi lífrænu form fuglanna og yfirfæra í geometrísk hrein form og línur. Sýningin samanstendur af olíumálverkum og verkum unnum með blandaðri tækni þar sem ég prenta ákveðnar grunnlínur og bæti svo við og byggi upp verkið með vatnslitum og pennum.“

Hann segist hafa unnið að sýningunni í eitt ár þar sem það tekur tíma og þolinmæði að mála olíuverk, auk þess sem daglegt líf og vinna tekur sinn tíma líka.

Ekki aftur snúið

Sæþór er fæddur árið 1978 og ólst upp í Breiðholtinu. Hann segist ekki muna eftir sér öðruvísi en að teikna og skapa. „Ég var enn í grunnskóla þegar ég málaði í fyrsta skipti á striga og þá varð ekki aftur snúið. Seinna lærði ég hreyfigrafík á Ítalíu og hef unnið við það frá útskrift árið 2004. Í dag á ég og rek Farva, sem er hönnunarstúdíó, prentverkstæði, verslun og netverslun (farvi.is) ásamt eiginkonu minni Tobbu. Meðfram rekstri Farva mála ég olíumálverk en olíumálningin hefur alla tíð heillað mig mikið. Á prentverkstæðinu sérhæfum við okkur í riso- og silkiprenti, og hef ég því notað þann miðil töluvert í verk mín síðustu ár. Auk þess á ég þrjú frábær börn, Sögu Maríu, Sölku Elínu og Baldur Pál, og eðlilega fer mestur partur tímans í fjölskylduna og samveru með henni.“

Eitt olíumálverk á viku

Sæþór tók þátt í sinni fyrstu samsýningu á vegum Unglistar árið 1996 og ári síðar hélt hann sína fyrstu einkasýningu í Gallerí Geysi, þá 19 ára gamall. „Meðal annarra sýninga eru útskriftar- og samsýning úr Istituto Europeo di Design sem haldin var í Guggen­heim í Feneyjum árið 2004. Þar vorum við með vídeóverk og innsetningar til sýnis. Síðustu málverkasýningar mínar voru á Mokka árið 2010 þar sem ég sýndi portrett málverk. Árið 2014 setti ég mér svo það markmið að mála eitt olíumálverk á viku. Það hafðist ekki alveg en ég náði 30 verkum og afraksturinn var sýndur á Mokka árið 2015.“

Hann er ánægður með að hafa náð að opna sýninguna hjá þeim prýðisdrengjum Árna og Skarpa sem reka Gallery Port. „Þess utan stefni ég á að auka vægi þess tíma sem ég eyði í myndlistina og gefa henni meira pláss. Reksturinn á Farva verður plássfrekur en stóra markmiðið er að gefa myndlistinni meiri tíma og sjá hvort hún geti ekki staðið undir stærri hluta í launaseðilsins.“

Hægt er að kynna sér verk Sæþórs á farvapabbi.is og á Insta­gram (@farvi.is).

Sýningin verður opnuð í dag, laugardaginn 22. janúar, frá kl. 15-18, í Gallery Porti, Laugavegi 32 í Reykjavík. Stendur sýningin yfir til 3. febrúar. Opið þriðjudaga til laugardags, frá kl. 12-17.