„Það var hann Balli vinur okkar sem reddaði rjúpunum þar sem veiði hefur verið dræm okkar megin þetta árið. Þær eru að sjálfsögðu skotnar í Búrfellshrauni í Mývatnssveit og vill Balli meina að þær rjúpur sé þær bestu á landinu og að sjálfsögðu skulum við trúa því,“segir Berglind og hlær.

Uppskriftirnar af elduninni á rjúpunni og meðlætinu eru komnar frá mömmu Berglindar og systur hennar, Guðrúnu. „Mamma var með eina þar sem til dæmis hugmyndina með perurnar og rauðbeðusalatið var að finna en svo er eldunin og sósan komin frá systur minni. Margir mauksjóða rjúpurnar í sósunni og vilja láta þær hanga lengi svo villibráðarbragðið skíni sterkt í gegn. Þessi aðferð er þó öllu nýstárlegri og eru rjúpurnar mun mildari á bragðið en á hinn veginn,“segir Berglind og er nokkuð ánægð með þessa nýstárlegu aðferð.

Rjupur-29-BH.jpeg

Rjúpur

Fyrir 2-3 manns

Rjúpusoð uppskrift

  • ½ laukur
  • 30 g smjör
  • 2-3 læri, fóarn og hjörtu
  • 1 tsk. salt
  • 600 ml vatn
  1. Steikið laukinn upp úr smjörinu og saltið.
  2. Steikið kjötið með lauknum þar til það brúnast og hellið þá vatninu yfir og leyfið að sjóða í um 1 ½ klukkustund (lengur ef þið viljið meira bragð).
  3. Sigtið síðan allt gumsið frá og notið soðið í sósuna.

Rjúpusósa

  • 80 g smjör
  • 2 msk. hveiti
  • Rjúpusoðið hér að ofan
  • 300 ml rjómi
  • 3 tsk. Oscar Vildt kraftur
  • 2 tsk. bláberjasulta
  • 2 tsk. gráðaostur
  • 3 msk. Muga rauðvín
  • Salt og pipar eftir smekk
  1. Bræðið smjörið í potti, pískið hveitið saman við og hellið næst soðinu yfir og pískið vel saman allan tímann.
  2. Bætið þá rjómanum og öðrum hráefnum saman við, smakkið til með krafti og kryddum og leyfið að malla aðeins.

Rjúpur eldun

  • 8 rjúpubringur
  • Smjör til steikingar
  • Salt og pipar
  • 6 x ½ niðursoðnar perur í dós
  • Rifsberjasulta
  1. Hitið ofninn í 190°C.
  2. Snöggsteikið bringurnar upp úr vel af smjöri í rúmlega hálfa mínútu á hvorri hlið.
  3. Raðið í eldfast mót og hellið sósu upp á miðjar bringur (berið restina af sósunni fram með máltíðinni).
  4. Bakið í 10-13 mínútur eftir stærð.
  5. Þegar fatið er tekið úr ofninum má raða perunum í kring og setja rifsberjasultu ofan í „holuna“.
  6. Njótið með rauðbeðusalati og brúnuðum kartöflum.
Rjupur-59-BH.jpeg

Brúnaðar kartöflur

  • Um 900 g soðnar kartöflur
  • 150 g sykur
  • 30 g smjör
  • 1 msk. rjómi
  1. Setjið sykurinn á pönnu á háan hita.
  2. Þegar hann byrjar að leysast upp þarf að lækka hitann, setja smjörið saman við og hræra vel saman.
  3. Næst má setja rjómann saman við og leyfa blöndunni aðeins að „bubbla“ og hella kartöflunum á pönnuna og velta upp úr karamellunni.

Rauðbeðusalat

  • 3 gul epli (flysjuð og skorin smátt)
  • Um 250 g rauðbeður (skornar smátt niður)
  • 3 msk. rifsberjahlaup, brætt í örbylgjuofni/potti svo úr verði saft
  • 300 ml þeyttur rjómi
  1. Blandið rifsberjahlaupinu saman við söxuð epli og rauðbeður með sleikju.
  2. Blandið næst þeytta rjómanum saman við og berið fram.
Rjupur-39-BH.jpeg