Súpur eru einfaldar, næringarríkar og ódýrar. Það þarf ekki meira en saxað grænmeti, grænmetissoð, jurtamjólk eða -rjóma og krydd. Auðvelt er að breyta innihaldsefnum, þykkja eða þynna og þar fram eftir götunum. Súpugerð fylgir mikið athafnafrelsi.

Þessa sveppasúpu er auðvelt að laga til eftir eigin höfði. Magn innihaldsefna er langt í frá að vera heilagt. Þá er líka hægt að prófa sig áfram með ýmsum innihaldsefnum til að þykkja eða bragðbæta. Þessi uppskrift er ekki með innihaldsefnum sem þykkja súpuna en undir „Athugið“, hér fyrir neðan, má sjá nokkrar uppástungur að því hvernig hægt er að gera súpuna þykkari.

Ágætt er að hafa í huga að sveppir minnka umtalsvert þegar þeir eru eldaðir og því um að gera að hafa meira magn sveppa og vera óhrædd við að blanda saman ólíkum tegundum sveppa.

Sveppasúpur eru mikið lostæti. Nordicphotos/GETTY

Sveppasúpa

1-2 msk. olía eða vegansmjör

2-3 bollar saxaðir sveppir, t.d. þessir hefðbundnu (ekki verra að hafa nokkrar tegundir)

1 gulur laukur, saxaður

3-4 söxuð hvítlauksrif (eða 1 tsk. hvítlauksduft)

2-3 bollar grænmetissoð eða vatn og grænmetiskraftur (það er virkilega gott að nota líka sveppakraft ef hann er til)

1-2 bollar jurtarjómi (hafra, möndlu eða soja) eða 1 dós af kókosmjólk

Salt og pipar

Ferskt eða þurrkað krydd: t.d. timjan, steinselja og/eða salvía

Hitið olíu eða vegansmjör, steikið laukinn í 2-3 mínútur.

Bætið við söxuðum sveppum ásamt hvítlauk og kryddum og léttsteikið í nokkrar mínútur, þar til vökvinn er að mestu farinn úr sveppunum.

Bætið við grænmetissoði (eða vatni ásamt sveppa- og/eða grænmetiskrafti) og látið suðuna koma upp.

Bætið við jurtarjóma og leyfið súpunni að malla.

Smakkið til með salti, pipar og öðrum kryddum.

Athugið:

- Alltaf er gott að hafa ferskar, saxaðar kryddjurtir eins og t.d. timjan og steinselju.

- 1-2 lárviðarlauf er líka gott, sé það til, og er það þá sett með vökvanum og fjarlægt í lokin.

- Sumum finnst gott að mauka súpuna með töfrasprota til að þykkja hana, annaðhvort alla eða taka hluta sveppanna til hliðar og setja svo aftur út í svo súpan sé ögn bitastæðari.

- Til þess að þykkja súpuna er líka hægt nota ýmist hveiti, tapíókamjöl, maísmjöl eða soðnar, maukaðar kartöflur (eða jafnvel soðið og maukað blómkál).

- Þá getur líka verið gott að bæta við vegan-rjómaosti, sé hann innan handar.

- Sumum þykir gott að bæta við smá hvítvíni (eða rauðvíni eða sérríi) á sveppina við lok steikingar, rétt áður en vökvanum er bætt við.

- Ef notast er við hveiti, eða tapíókamjöl til þykkingar þá er gott að blanda því annaðhvort við smá vatn eða jurtamjólk í lokuðu íláti og hrista vel, þar til engir kekkir eru, og setja með soðinu. Þá er líka hægt að strá hveiti yfir sveppina eftir að þeir eru steiktir, bæta við fitu ef þarf, hræra vel og vandlega svo engir kekkir séu, svo bæta við grænmetissoði og ná upp suðu.