Sara vann að sýningunni í rúm þrjú ár.

„Þegar ég vinn að sýningum byrjar ferlið yfirleitt með lestri og grúski. Ég sökkvi mér ofan í viðfangsefnið og leyfi mér að fá þráhyggju fyrir því, enda koma frumlegustu hugmyndirnar þaðan. Maður er orðinn fróðari, getur auðveldlega púslað saman stykkjum og séð hvað vantar.

Í þetta sinn fór ég að grúska í bók sem heitir Cosmic Trigger eftir Robert Wilson og þar talar hann mikið um Hundastjörnuna sem kemur oft fyrir í dulspeki og trúar- og menningarheimum. Ég las fleiri bækur og kynnti mér alls kyns skoðanir manna á geimnum,“ segir Sara.

Ólík verk

Sýningin er myndræn geimferð frá jörðinni til Mars og aftur til baka. Listakonan sýnir mikla hugmyndaauðgi í ólíkum verkum sínum.

„Hugmyndin byrjar í teikningu og síðan er sú teikning þróuð, á þessari sýningu nota ég til dæmis laserprentun í gler. Ég vinn við það sjónræna og ég stílisera hugmyndirnar eða innihaldið eftir því hvað mér finnst henta best. Ég gerði teikningar, málverk, innsetningar og prentverk um þetta viðfangsefni, geimferð til Mars, flakka á milli miðla eins og ég geri venjulega. Ég fjalla meðal annars um það af hverju verið sé að fara til Mars, skoða ævintýrablætið og eldflaug Tinna sem fór til tunglsins. Ég vísa líka í myndheim Hollywoodmynda um geimferðir til Mars þar sem geimverur koma við sögu.“

Listakonan gleymir svo vitanlega ekki því skaðlega við geimferðir, sem er allt það rusl sem skilið er eftir úti í geimnum og lítið er fjallað um.

Sýningin er um allt húsið og utandyra eru tvö verk.

„Ég hafði húsið algjörlega í huga þegar ég vann verkin,“ segir Sara.

Kallar á samræður

Hún segir aðspurð að viðbrögð við sýningunni hafi verið ákaflega góð.

„Eins og sýningar sem fjalla um ákveðið efni þá kallar þessi sýning á samræður milli kynslóða. Þegar maðurinn fór fyrst til tunglsins sameinaðist heimurinn í áhuga sínum en núna þykir varla fréttnæmt að geimflaug sé skotið upp. Viljum við fara út í geiminn? Já, líklega. Viljum við flytja þangað? Líklega ekki. Viljum við nota alla kraftana, auðinn og hugaraflið sem fer í geimrannsóknir til að bæta lífsskilyrði á jörðinni? Ég er ekki endilega með rétt svör heldur velti fyrir mér afleiðingum hugmynda.“

Sara hefur frá námsárunum tekið virkan þátt í alþjóðlegu starfi götulistamanna í Evrópu og víðar.

Hún hefur sýnt verk sín í flestum höfuðsöfnum Íslands og tekið þátt í fjölmörgum sýningum hérlendis og erlendis og verið heiðruð af virtum menningarstofnunum.