Anna Sigga, eins og hún er alltaf kölluð, hefur í nógu að snúast þessa dagana með marga bolta á lofti en gefur sér ávallt tíma til að borða enda lykillinn að því að geta komist vel gegnum daginn. Við fengum Önnu Sigríði til að segja okkur hvernig hefðbundinn dagur hjá henni lítur út, þegar kemur að næringunni.

Anna Sigga segir að mataræði sitt sé fyrst og fremst fjölbreytt þar sem ekkert er bannað. „Það má segja að mataræðið mitt sé í takt við það sem ég legg áherslur á í þáttunum – fjölbreytt fæði þar sem ekkert er bannað en rík áhersla lögð á að jurtafæði sem uppistöðu – grænmeti, ávexti, gróft kort, belgjurtir, hnetur og fræ. Mér finnst fiskur mjög góður og hann fer betur í mig en kjöt en ég útiloka það þó alls ekki úr fæðunni heldur er það meira sparimatur eða „krydd“. Á barnmörgu heimili finnst mér mikilvægt að alls konar matur sé í boði og fundnar leiðir sem falla að smekk allra, á sama tíma og ég vil að við borðum í grunninn sams konar mat.“ Anna Sigga segir að ef hún ætti að setja einhvern stimpil á fæðuvalið væri það vistkerafæði, eða flexitarian. „Mér finnst líka ágætt orð því að gefur í skyn vissan sveigjanleika. Þetta fæði hefur þann kost að vera ekki bara hollt fyrir okkur, heldur einnig betra fyrir umhverfið. Samhliða því reyni ég að nýta matinn vel, og janúar er oft sambland af nýtingarmánuði þar sem ég reyni að nýta hugmyndaflugið til að útbúa afgangana og frysti girnilega og sleppi því að kaupa kjöt.“

Morgunnautnastundin mikilvæg

Nautnastund á vel við í upphafi dags hjá Önnu Siggu. „Mér finnst ljúft að byrja morguninn á góðum kaffibolla, helst eftir að morgunumferðinni í eldhúsinu lýkur og börnin eru farin í skólann, fletta í gegnum blöðin og afgreiða tölvupóstinn. Þá gjarnan með eina og hálfa grófa súrdeigsbrauðsneið, eða tvær ef ég er komin í endana á brauðinu þar sem sneiðarnar eru minni. Áleggið er oftast ostur af gömlum vana, en heimagert hummus með avókadó og sítrónu eða heimagert hnetusmjör og eplasneiðar þegar ég gef mér til þess tíma, og lítið glas af safa til að hafa með lýsinu. Egg bætist við um helgar, tómötum skellt með á pönnuna og kóríander eða steinselju úr gluggakistunni. En það kemur alveg fyrir að ég næ ekki þessari nautnastund sem morguninn er og þá finn ég hvað hún er mér mikilvæg inn í daginn ekki síst þegar mikið er að gera.“

Hádegisskipulagið flóknar

Þegar kemur að hádegisverðinum er málið flóknara. „Mér hefur ekki tekist að hafa skipulag á hádeginu síðustu tvö árin, þegar maður hefur ekki vinnufélagana til að fara með í mat á ég það til að gleyma mér í vinnu – lúxusvandamál þegar maður vinnur við áhugamál sitt og ástríðu en vissulega skiptir máli að hafa góða rútínu. Gott mötuneyti væri draumurinn og ég er alltaf sérlega glöð þegar hittir þannig á að ég er á fundum í SagaFilm í kringum hádegið, en þau framleiða þættina mína. Mötuneytið þar er einstaklega gott, fjölbreyttur matur, ferskur og nóg af grænmeti. Maður finnur að alúð er lögð í matinn.“

Börnin bera líka ábyrgð

Krakkarnir hennar Önnu Siggu bera líka ábyrgð á matseðli heimilisins. „Krakkarnir mínir eru 11, 14 og 17 ára og síðasta haust byrjuðum við að skipta með okkur ábyrgðinni og á hvert sinn dag þar sem þau bera ábyrgð á matseðlinum sem settur er saman á mánudagskvöldum. Það var alltaf suðað og kvartað þegar var fiskur í matinn þannig að ég fékk það í gegn að mánudagar væru fiskidagar, óháð því hvort væri fiskur í matinn þann daginn í skóla einhvers þeirra. Það tók smá tíma fyrir þau að átta sig á að það er alveg jafn sjálfsagt að fá fiskmáltíð tvisvar á dag eins og að fá hakk og spaghettí í hádeginu og lasagna á kvöldin. Smám saman mjökumst við í átt að sátt.“

Magaóþægindi skemma ánægju

Finnst þér skipta miklu máli hvað þú borðar þegar kemur að því að huga að orku og úthaldi? „Ég stunda náttúruhlaup og hvers konar útivist og veit að ég þarf að borða vel þegar hreyfingin er mikil og varir lengi. Þar eins og með annan mat finnst mér best að velja bita sem fara vel í mig, vel frekar mat en tilbúin stykki og gel. En þarna þarf maður að læra á sínar þarfir og prófa sig áfram og finna vörur sem maður þolir í maga. Magaóþægindi geta skemmt bæði ánægju og árangur.“ Önnu Siggu finnst líka skipta máli að velja mat sem er fallegur og lokkar augað. „Það skiptir mig máli að velja mat sem er fallegur, góður og lætur manni líða vel, án þess að flækja matreiðsluna um of. Samtíningur og góð hráefni finnst mér oft hvað besta matarupplifunin. Ótal litlar skálar á borðinu og dundað við að setja saman góðan disk, og ekki síðra í góðum félagsskap.“

Anna Sigga gefur lesendum uppskrift að hummus með rauðrófum. „Mér finnst bleiki liturinn á hummusinum svo ómótstæðilegur og uppskriftin er svo einföld. Magnið fer eftir smekk, slumpið og tilfinningin ræður samsetningu og áferð hverju sinni.“

gettyimages-686736513.jpg

Bleiki liturinn er ómótstæðilegur og lokkar bæði auga og munn. FRÉTTABLAÐIÐ/GETTY.

Ómótstæðilegur rauðrófuhummus

Rauðrófur eftir smekk

Rauðrófur skrældar og skornar í litla teninga. Teningunum velt upp úr smá olíu og salti og bakaðir í ofni á 200°C þar til þeir eru orðnir mjúkir.

Rauðrófukubbana er gott að eiga í kæli og henda út á salöt eða ofan á brauðsneið eða nota í hummusinn þegar ykkur langar.

Hummusinn

1 dós kjúklingabaunir (ca 3,5dl ef soðnar baunir)– mestu af safanum hellt af en nota má hluta af safanum til að þynna ef maður vill

2 msk. tahini (sesamfræjamauk)

½ dl ólífuolía

safi úr ½ sítrónu

salt, hvítlaukur og chilli eftir smekk (ferskt eða duft)

smá rifinn sítrónubörkur getur líka gefið auka kikk

1 dl rauðrófuteningar eða eftir smekk, láta kólna fyrir notkun

Maukið allt í blandara eða með töfrasprota þar til blandan hefur náð góðri áferð. Má þynna meira með baunasafanum, ísköldu vatni eða meiri ólífuolíu og sítrónsafa eftir smekk. Bæta má við fleiri kryddtegundum og það eru til alls konar góðar hummus uppskriftir.