Í dag verður tilkynnt um samstarf tveggja kanóna í íslenskri fatahönnun, Kormáks & Skjaldar og 66°Norður. Um er að ræða nýja útfærslu af jakkanum Öxi, en hún er tileinkuð íslenskum hestamönnum. Jakkinn er hluti af reiðfatalínu Kormáks & Skjaldar sem væntanleg er í verslanir þeirra. Öxi jakkinn hentar frábærlega í almenna útivist, dagsdaglega og ekki síður í reiðmennsku líkt og margar flíkur sem 66°Norður hefur framleitt síðustu áratugi. Jakkinn kemur í kvenmanns- og karlmannssniði, hvort um sig í tveimur útgáfum.

Byrjuðu í notuðum fötum

„Við reyndum að láta þeirra stíl og útlit mæta okkar í jakkanum. Við fórum þá leið að gera tveed-print útgáfu af jakka frá þeim, til að tengja ólíka stíla fyrirtækjanna saman. Jakkinn er svo hluti af miklu stærra verkefni hjá okkur,“ segir Gunnar Hilmarsson, yfirhönnuður Kormáks & Skjaldar.

Kormákur & Skjöldur eru vanalega með frekar stórar línur, bæði karl- og kvenmannsfatnað.

„Við byrjuðum fyrir alvöru að framleiða okkar eigin línur árið 2010,“ segir Kormákur Geirharðsson, annar eigandi verslunarinnar.

„Við byrjuðum á sínum tíma með notuð föt fyrir tuttugu árum í kjallara hérna á Hverfisgötu,“ segir Skjöldur Sigurjónsson, hinn helmingur tvíeykisins.

„Aðalástæðan fyrir því að við fórum að framleiða sjálfir var sú að við fundum ekki það sem okkur langaði að selja. Neyðin kennir naktri konur að spinna,“ segir Kormákur.

Eigendurnir Skjöldur Sigurjónsson og Kormákur Geirharðsson ásamt yfirhönnuðinum Gunnari Hilmarssyni
Fréttablaðið/Anton Brink

Ekki bara fyrir hestafólk

Eins og áður kom fram heitir nýjasta línan Reiðklæði.

„Þetta er reiðfatnaður en ekki endilega bara til að fara á hestbak á, þú getur klæðst þessu líka dagsdaglega,“ segir Skjöldur.

Kormákur segist alltaf hafa litið á þetta sem fyrst og fremst útivistarfatnað.

„Þetta passar vel við hesta en líka allt eins til að fara út að ganga með hundinn,“ bætir Skjöldur við.

„Þetta snýst kannski smá um að ramma inn ákveðna menningu, eins og þeir segja þá getur þetta allt eins verið notað í veiðar eða hvað sem er,“ segir Gunnar, en hann segir reiðtenginguna fyrst og fremst lýsa stílnum á fatnaðinum.

„Sumt af þessu getur maður notað sem jakkaföt dagsdaglega,“ segir Kormákur.

Samstarfið kemur í sölu í dag í verslun 66°Norður á Laugarvegi
Fréttablaðið/Anton Brink

Fyrir íslenskt veðurfar

Kormákur segir fatnaðinn sem þeir framleiða henta sérstaklega vel fyrir íslenskt veðurfar.

„Fólk sem er að koma til okkar talar sérstaklega um hvað þeim finnst hentugt að geta klæðst þessu allt árið, þetta eru þannig efni,“ bætir hann við.

„Svo leggjum við upp úr því að vera með mjög vönduð efni og að gera föt sem endast, þannig að það spornar gegn sóun. Þá kaupir fólk sér aðeins dýrara en flíkin nýtist mun lengur og vinnan á bak við hana er vönduð,“ segir Skjöldur.

Gunnar segir að þótt þetta kallist reiðfatnaður þurfi það ekki endilega þýða að hann nýtist einungis við hestamennsku, heldur lýsi orðið frekar stílnum,
Mynd/Baldur Kristjánsson

Örfá eintök í boði

Gunnar segir að tilurð samstarfsins hafi verið skemmtileg og það hafi gengið einstaklega fyrir sig.

„66°Norður er náttúrulega leiðandi í gerð útivistarfatnaðar og mikið notað af hestafólki. Okkur langaði líka að finna leiðina frá okkar útliti yfir í þeirra og mæta því í miðjunni. Það var skemmtilegt ferli. Þótt fyrirtækin séu ólík þá eiga þau margt sameiginlegt, þau ganga bæði út frá svipuðum hugsjónum með sögu, nýtingu og gæði,“ segir Gunnar.

„Þau voru nú þegar að hugsa um að endurvekja reiðlínuna sína, þannig að þetta gekk mjög fljótt saman og var gott samstarf. En jakkinn var ekki framleiddur í mörgum eintökum, svo fólk verður að drífa sig og kaupa hann,“ segir Kormákur léttur og þeir hlæja allir þrír.

Samstarfið verður kynnt og jakkinn fer í sölu klukkan 17.00 í verslun 66°Norður við Laugaveg.

Kormákur segir að jakkinn hafi ekki verið framleiddur í mörgum eintökum.
Mynd/Baldur Kristjánsson