Sæþór Kristínsson er kominn alla leið í úrslitaþátt tíundu seríu bakstursraunveruleikaþáttarins Den store bagedyst sem verður sýndur í dönsku sjónvarpi í kvöld. Hann segir mikinn létti fylgja því að geta loksins sagt frá þessu í samtali við Fréttablaðið.

Þótt Sæþór hafi búið í Danmörku síðan hann flutti þangað frá Íslandi sjö ára gamall má með sanni segja að þjóðin eigi sinn fulltrúa í raunveruleikaþættinum vinsæla sem var tekinn upp fyrr á þessu ári.

Sæþór hefur því mátt þegja lengi yfir leyndarmálinu um að hann hafi komist í lokaþáttinn.

„Þetta hefur verið klikkað,“ sagði Sæþór þegar Fréttablaðið ræddi við hann þegar sýningar hófust í síðasta mánuði og lét fylgja sögunni að ferlið allt hefði verið gríðarlega krefjandi.

Litblindur á marsipan

Sæþór byrjaði að baka þegar hann eignaðist dóttur sína sem verður níu ára í byrjun næsta árs og þátttöku sína tileinkar hann minningu móður sinnar, Kristínar Steingrímsdóttur, sem lést úr krabbameini í janúar.

Sæþór hefur átt mjög góðu gengi að fagna í þættinum auk þess sem andinn milli keppenda má heita býsna góður miðað við raunveruleikasjónvarp.

Sæþór hefur slegið í gegn í þáttunum og gengið vel hingað til þótt hann hafi á einum tímapunkti lent í vandræðum með marsípanþraut.

„Ég er sem sagt litblindur og tapaði þeirri keppni,“ segir Sæþór hlæjandi.„Þau sögðu að litirnir væru ekki réttir í grundvallaratriðum,“ útskýrir Sæþór sem segist ekki hafa látið þetta stoppa sig.

„Alls ekki. Ég hef verið litblindur allt mitt líf og frekar vanur slíku og tók þessu bara af stóískri ró.“

Gott að geta sagt frá

Úrslitin voru tekin upp í sumar og Sæþór gefur vitaskuld ekkert upp um úrslitin sem komu í ljós í gærkvöldi. „En það er gríðarlega huggulegt að geta loksins sagt fólki að ég hafi komist alla leið í úrslitin,“ segir Sæþór léttur.

Keppendur í Den store bagedyst hafa hvergi gefið eftir en Sæþór getur nú loksins upplýst að hann komst alla leið í úrslitaþáttinn.
Mynd/Aðsend

Þátturinn er meðal vinsælustu þátta Danmerkur og Sæþór hefur fengið mikla athygli. „Fólk er farið að þekkja mig úti á götu og það hefur stundum jafnvel heilsað mér og er mjög almennilegt.“

Þá hefur Sæþór haft nóg að gera á samfélagsmiðlum og fylgjendafjöldinn hefur, eðlilega, rokið upp úr öllu valdi.

Bakað úr íslenskum rótum

„Ég gerði kökur sem eru innblásnar af Íslandi,“ segir Sæþór um útspil sitt í lokaþættinum en þar mun hann heiðra íslenskar rætur sínar og Egils Malt og Nóa Kropp koma við sögu svo fátt eitt sé nefnt.

Þá ætla systur hans að koma í heimsókn í kvöld og horfa á útsendinguna með honum auk þess sem hann hyggst baka alveg eins kökur fyrir þær og hann teflir fram í úrslitaþættinum á skjánum.