Frá því Ásgerður Ólafsdóttir, nemandi í vöruhönnun við Listaháskóla Íslands, man eftir sér hefur hún haft áhuga á listum og hönnun og stefndi alltaf að einhverju leyti í þá áttina í lífinu. „Ég lærði fatahönnun í tvær annir í Amsterdam áður en ég flutti heim til þess að hefja nám í viðskiptafræði. Á þeim tímapunkti hafði ég fundið að ég vildi ekki einskorða mig við fatahönnun og vildi bæta við mig þekkingu í viðskiptum til þess að geta haldið utan um mögulegan eigin rekstur í framtíðinni.“

Jakki gerður úr slitnum armkútum sem höfðu fallið til í laugum borgarinnar. Samstarfsverkefni Ásgerðar, Hrafnhildar Gunnarsdóttur og Kamillu Henriau fyrir sýninguna Hlutverk á HönnunarMars árið 2021.

Eftir útskrift úr viðskiptafræðinni segist Ásgerður hafa fundið hvað hún saknaði listarinnar og ákvað því að sækja um hönnunarnám um haustið. „Það var bróðir minn sem benti mér á vöruhönnunina við Listaháskólann og reyndist það vera nákvæmlega það sem ég hafði verið að leita eftir.“

Lokaverkefni Ásgerðar af öðru ári í vöruhönnun ber heitið Sær og er sjósundsflík úr ull ásamt handklæði með útsaumuðum notkunarleiðbeiningum.

Textíllinn heillar alltaf

Samhliða náminu í vöruhönnun hefur Ásgerður hannað og saumað sundföt og ýmsan annan fatnað. „Mér hefur alltaf þótt vænt um sundmenninguna og held að áhugi minn á sundfötum sé sprottinn upp úr því. Umhverfið og fólkið í Vesturbæjarlaug og í Nauthólsvík, þar sem ég hef starfað undanfarin ár, er líka góður innblástur en áhuginn var þegar til staðar.“

Ullin býr yfir eiginleikum sem henta sérstaklega til sunds í köldum sjó og náttúrulegt efnið losar ekki örplast við notkun og þvott eins og búast má við af öðrum sundfatnaði. AÐSEND/FJÖLNIR ÓLAFSSON

Verkefnin í náminu hingað til hafa verið fjölbreytt að hennar sögn. „Þau hafa gefið mér tækifæri til þess að kynnast mismunandi aðferðum, bæði í hönnun og framleiðslu, og það hefur opnað marga nýja spennandi möguleika. Áhuginn liggur víða en ég virðist alltaf koma aftur til baka í textílinn og er alltaf með nokkur verkefni í höndunum.“

Handklæðið sem einnig geymir flíkina og hjálpar henni að halda lögun sinni má binda saman og bera á öxlinni.

Tveggja gráðu draumur

Ásgerður stefnir á útskrift sumarið 2023 og segir framtíðina bæði spennandi og óljósa. „Draumurinn er að fá tækifæri til þess að tvinna þessar gráður saman í starfi í framtíðinni en hvernig það mun líta út er enn óljóst. Ég er þó viss um að þær haldast vel í hendur og er spennt að sjá hvaða tækifæri muni bjóðast. En fyrst er að klára BA-ritgerðina og lokaverkefnið fyrir útskrift næsta sumar. Einnig mun bekkurinn minn vinna saman að hópverkefni og verður lokaútkoma þess sýnd í lok árs.“