„Ég er Copenhell-gullsmiðurinn,“ segir Jónas Breki vígreifur en eftir að hafa lengi verið þekktastur fyrir hauskúpuhringa sína hefur hann heldur betur haslað sér völl í Danmörku, þar sem hann býr með fjölskyldu sinni, með skarti sem hann gerir innblásinn af norrænni goðafræði.

„Ég er svo stoltur af því að geta sagst hafa hannað og gert fyrsta opinbera Copenhell-hringinn,“ segir Breki og brosir breitt enda stendur hin rómaða vítisveisla í Kaupmannahöfn nærri rokkhjörtum hans og Gúrýjar, konunnar hans.

„Þessi hátíð er svo mikið við og alltaf þegar við mætum er það eins og ættarmót í besta hugsanlega skilningi. Við Gúrý höfum mætt á hátíðina í átta af þeim ellefu skiptum sem Copenhell hefur verið haldin. Það skemmtilegasta er svo að krakkarnir okkar fá alltaf að vera með í einn dag og þetta var í fjórða skiptið sem þau komu með.“

Krakkadaginn bar að þessu sinni upp á 16. júní, afmælisdag Breka, sem segir rokkhátíð með börnunum hafa verið sérstaklega góða afmælisgjöf þar sem fjölskyldan hristi höfuð sín saman í takt við ekki ómerkari kanónur en Korn, Knocked Loose, Opeth, Judas Priest og KISS.

„Þetta var geggjað og gaman að segja frá því að Breki jr. „crowd­sörfaði“ í fyrsta sinn á ævinni. Aðeins ellefu ára á Judas Priest tónleikunum.

Úlfur í vítislogum

Copenhell var haldin í lok júní þegar hún losnaði loks úr tveggja ára niðurdrepandi Covid-læðingi og gullsmiðurinn fékk loks að sjá glampa á rokkaða vítisloga í rokkskartinu sem stofnendur hátíðarinnar báðu hann um að hanna 2020.

Verkið sem Breki var beðinn um að byggja hringinn á.
Mynd/aðsend

„Það var í janúar 2020 sem einn af þremur stofnendum Copenhell sendi mér tölvupóst þar sem hann spurði hvort við gætum hist augliti til auglitis á verkstæðinu vegna þess að hann vildi ræða samstarf um skartgripi,“ segir Breki og bendir á að þremenningarnir séu í fullri vinnu allan ársins hring að undirbúa hverja Copenhell-hátíð.

„Þegar hann mætti kom hann sér beint að kjarna málsins og sagði að þeir hjá Copenhell vildu fá mig til þess að hanna og gera „official“ Copenhell-hringinn með Fenrisúlfinum sem listamaðurinn Victor Ash málaði á sínum tíma fyrir hátíðina á gömlu skipasmíðastöðina við Refshalevej.“

Seint koma sumir …

Breki segist aðeins hafa átt eitt svar við þessari beiðni: „Af hverju tók það ykkur tíu ár að tala við mig? Ég hannaði síðan og gerði í einum hvelli þrjár mismunandi prótótýpur af Fenri. Það tók þá tvær vikur að ákveða hvaða hönnun þeir vildu. Síðan gerðu þeir pöntun og borguðu auðvitað fyrir hana og búmm! Fökking Corona!“

Breki afgreiddi pöntunina fljótt og örugglega en þegar á hólminn var komið var ekki hægt að drepa úlfinn úr dróma. „Þannig að það var auðvitað ekkert festival 2020 en ég reyndi mikið að pressa á að setja hringinn í sölu á vefsíðunni þeirra en þeir vildu það ekki vegna þess að þeim fannst fólk verða að sjá hringinn með eigin augum. Þess vegna kom hringurinn fyrst út í ár,“ segir Breki.

Úlfurinn rokkar

„Það er svo geðveikt að hringurinn seldist upp á hátíðinni en þremur dögum fyrir hátíðina var hægt að sækja aðgangsarmböndin á svæði við hliðina á Kødbyen hjá aðaljárnbrautarstöðinni í Köben þar sem þeir voru með svið, hringana, alls konar varning og massa af bjór til sölu,“ segir Breki, sem rokkar feitt í Danmörku þetta árið.

Bæði sem yfirlýstur gullsmiður Copenhell auk þess sem enn má skoða dauðadjásn hans á skartgripasýningunni Makabre Mesterværker í Sønderborg-höll. Þar vinnur hann einnig úr goðafræðinni og ferðalagi Freydísar Eiríksdóttur rauða til Valhallar með tengingum við galdrastafinn Vegvísi.