Að grípa í prjónana jaðrar við að vera jóga,“ segir flugumferðarstjórinn Heiðrún Erla Guðbjörnsdóttir.

Heiðrún er í Prjónafjelaginu sem gaf á dögunum út prjónabókina Leikskólaföt 2, sem er framhald af hinni geysivinsælu bók Leikskólaföt.

„Prjónafjelagið varð til utan um ástríðuverkefni fjögurra vinkvenna sem vildu búa til prjónabók,“ útskýrir Heiðrún sem smitaðist fyrst af prjónabakteríunni þegar hún eignaðist börn en hún er fjögurra barna móðir.

„Okkur Evu Mjöll Einarsdóttur flugumferðastjóra varð vel til vina í vinnunni í gegnum sameiginlegt prjónaáhugamál okkar og þræddum saman prjónabúðirnar, þar á meðal Litlu prjónabúðina í Faxafeni. Hún er hálfgerð félagsmiðstöð kvenna sem koma þangað inn í leit að garni en eru, áður en þær vita af, sestar niður, byrjaðar að fitja upp og farnar að prjóna í skemmtilegum félagsskap annarra prjónakvenna,“ upplýsir Heiðrún sem kynntist þar einmitt Prjónafjelagskonunum Sigurlaugu Elínu Þórhallsdóttur og Dagbjörtu Guðmundsdóttur, eiganda Litlu prjónabúðarinnar.

„Sigurlaug hreif okkur Evu með jákvæðni sinni og skemmtilegheitum, og Dagga (Dagbjört) er einkar yndisleg stelpa sem laðar fólk að sér,“ segir Heiðrún um einstaka vináttu sem myndast hefur í Prjónafjelaginu. „Þetta er algjörlega flekklaust samband og gengur aðeins of vel miðað við fjórar stelpur, sem gengur nú ekki alltaf upp. Þá er alveg sérstaklega gott að búa að sérfræðikunnáttu Döggu um prjónaskap og sem hefur hannyrðir að atvinnu.“

Mættu þörf fyrir börnin

Hugmyndin að bók um leikskólaföt kviknaði í einu prjónakaffinu.

„Þá kom upp úr dúrnum að það sárvantaði prjónauppskriftir að leikskólafatnaði og þörfin var mikil. Því ákváðum við að hanna falleg munstur og flíkur fyrir börn á aldrinum tveggja til sex ára og setja í eina bók, en svo komumst við að því að það væri ekki sniðugt því prjónakonan þarf létta bók sem hún getur stungið ofan í tösku og er úr endingargóðum pappír,“ segir Heiðrún um ástæðu þess að bækurnar eru orðnar tvær.

Meðal efnis í Leikskólafötum 2 eru uppskriftir að sokkum, húfum, vettlingum, peysum og samfestingum.

„Við höfðum í huga hvað nýtist leikskólabarninu best. Það eru hlý föt en líka létt inn á milli og sem gagnast á öllum árstíðum. Verkefnin eru fjölbreytt, allt frá einföldum uppskriftum fyrir byrjendur yfir í flóknari uppskriftir fyrir vant prjónafólk, og hægt er að velja um margs konar garn, þótt íslenska ullin sé vinsælasti valkosturinn,“ segir Heiðrún, en vinsælasta uppskriftin um þessar mundir er hlýr og dásamlegur samfestingur undir pollagalla.

Draumur Prjónafjelagskvenna er að gefa út fleiri prjónabækur.

„Þetta er ástríðu- og gæluverkefni okkar allra og það er gaman að gera bækur. Það gerir maður ekki á hverjum degi,“ segir Heiðrún en viðtökur við báðum bókunum hafa verið frábærar.

„Það er alltaf í móð að prjóna enda einkar notaleg iðja. Prjónaskapur og hannyrðir sameina fólk eins og í baðstofunni forðum og yfir prjóneríinu skapast tækifæri til að spjalla um áhugamálið og kynnast skemmtilegu fólki.“