Séra Davíð Þór Jónsson, sóknarprestur í Laugarneskirkju dró regnboga­fánann að húni við kirkjuna á meðan Mike Pence, varaforseti Bandaríkjanna, fundaði með helstu ráðamönnum þjóðarinnar „rétt utan við sóknarmörkin“, eins og hann orðaði það í sunnudagspredikun sem hverfðist um mannlega reisn.

Predikun Davíðs Þórs í Laugarneskirkju sunnudaginn 8. september

„Kirkjan á þennan fána. Hann er bara geymdur á góðum stað inni á skrifstofu prestsins og dreginn fram þegar tilefni er til,“ segir Davíð Þór við Fréttablaðið um fánann sem hann tengdi í predikun sinni við guðspjallatexta um það þegar Jesús Kristur líknaði krepptri konu sem var alls ófær að rétta sig við.

Á skjön við Krist

„Ég kaus að tengja þetta við þessa hugmynd um mannlega reisn og að allir eigi rétt á að fá að ganga uppréttir meðal meðbræðra sinna,“ segir Davíð Þór sem tengdi hugleiðingarnar við Pence sem „einn þeirra manna sem harðast hafa gengið fram gegn fólki sem lifir tilfinningalífi ólíku hans sjálfu, sem ógnar honum af einhverjum torskiljanlegum ástæðum.“

Hann bætti síðan við að þetta gerði Pence í nafni trúar sinnar en honum „er í mun að ljóst sé að hann sé kristinn maður. Þó er eins og hann telji Guð fara í manngreinarálit, að fyrir Guði skipti kynferði meira máli en kærleikurinn eða jafnvel bara yfir höfuð einhverju máli.“

„Heyrirðu illa?“

Þegar Davíð Þór er spurður út í þá þversögn að Guð geri mannamun og virðist nokkuð algeng hjá þeim sem tala mest og hæst um kristin gildi nefnir hann skopmynd þar sem Jesús messar yfir hópi fólks að þau skuli elska náunga sinn eins og sig sjálf.

Davíð Þór upp­lifir bók­stafs­trúar­skilning eins og verður vart hjá Pence á skjön „við megin­þemað í lífi og starfi frelsarans, sem er kær­leikur til allra manna.“
Fréttablaðið/Anton Brink

„Þá spyr einn úr hópnum: „Hvað með homma og útlendinga?“ og Jesús svarar. „Heyriðu illa?“ Maður hefur stundum á tilfinningunni að þeir heyri illa þessir blessuðu karlar sem reyna að útskúfa og kreppa og kúga og beygja náunga sinn í nafni kristindómsins.“

Davíð Þór sótti í predikuninni einnig rök fyrir því að Guð elskar fjölbreytileikann í sjálft sköpunarverkið og dró fram gríðarlegan fjölda köngulóartegunda sem þar er að finna.

„Þegar við virðum fyrir okkur Guðs góðu sköpun verður okkur ein staðreynd um Guð ljós og hún er sú að hann elskar fjölbreytileika. Hann skapaði ekki bara kónguló, hann skapaði 48.200 tegundir af kóngulóm.“

Guð elskar fjölbreytileika

Hann spann síðan út frá þessu og spurði: „Og hví skyldi hann ekki vilja hafa mannlífsflóruna fjölbreytta líka? Hvers vegna ætti hann að hafa skapað mannkynið þannig að stór hluti þess tengi tilfinningar sínar ekki kynferði eða tengi þær kynferði með öðrum hætti en flestir aðrir – ef hann síðan vill ekki hafa það þannig?“

Davíð Þór segist hafa flett fjölda köngulóartegunda upp á Wikipedia til þess að vera alveg viss. „En eins og ég segi, ef við horfum á sköpunarverkið og ætlum að draga einhverjar ályktanir um það fyrir hverju Guð hefur smekk þá hlýtur „fjölbreytni“ að vera fyrsta orðið sem kemur upp í hugann.“