Það hafa kannski einhverjir heyrt um að hundaeigendur og hundarnir þeirra séu stundum svipaðir í útliti. Eigendur velja kannski ómeðvitað hunda sem svipar til þeirra á einhvern hátt eða hafa smekk fyrir ákveðnu útliti sem hundurinn smellpassar við. En H&M er búið að taka þetta á nýtt stig með því að bjóða upp á föt í stíl fyrir hunda og eigendur þeirra. Þannig að í vetur geta hundaeigendur farið út í göngu með hundana sína og klætt sig alveg eins og þeir.

Það er ekki ósennilegt að þessi nýjung verði vinsæl á Instagram.

Fatnaðurinn er afrakstur samstarfs milli H&M og fatamerkisins Pringle of Scotland, sem hefur starfað frá 1815 og sérhæfir sig í prjónafatnaði. Hann er hluti af nýrri haust- og vetrarlínu H&M og gæti hentað íslensku loftslagi nokkuð vel. Í línunni er líka ýmiss konar fatnaður sem er ekki til í hundaútgáfu. Línan er gerð úr endurunnum efnum til að framleiðsla hennar hafi minni umhverfisáhrif og hún fæst á vef H&M.

Það eru áreiðanlega margir sem hefðu gaman af því að eiga peysu í stíl við hundinn sinn, fara síðan út í langan og góðan göngutúr í haustveðrinu.

Þetta er ekki í fyrsta sinn sem H&M selur peysur fyrir hunda, en hingað til hefur ekki verið hægt að fá peysu sem er með sama útliti í bæða manna- og hundastærð.

Þeir eru áreiðanlega margir sem myndu glaðir vilja eiga eins peysu fyrir sig og hundinn sinn og þetta er auðvitað upplögð gjöf handa þeim sem eru aðeins of miklir vinir hundsins síns. Sem betur fer er þetta nú loksins mögulegt og það er ekki spurning að þetta er nýr og glæstur áfangi fyrir allt mannkyn.