Árstíðir var stofnuð árið 2008 í fjármálakreppunni sem er flestum enn fersk í minni. „Við erum í raun fyrsta alvöru kreppubandið enda var bandið stofnað í sama mánuði og bankarnir hrundu. Kjarninn í bandinu erum við þrír stofnendur hljómsveitarinnar, ég, Daníel og Gunnar. Á tímabili vorum við flestir sex samtals í bandinu og meðal annars sellóleikari og fiðluleikari. Strengjahljóðfæri eru enn stór hluti af okkar hljóm og eru jafnan selló- og fiðluleikari með okkur á sviði,“ segir Ragnar.

Ólíkar áttir sem sameinast í einlægum rödduðum söng

Meðlimirnir þrír koma úr mismunandi áttum en eru allir lagahöfundar í hljómsveitinni. Upphaflega einblíndi hljómsveitin á órafmagnaða tónlist. „Við spiluðum allir á gítar og lékum okkur að því að radda söng. Núna spila ég á píanó á tónleikum. Sjálfur kem ég úr rokkáttinni úr böndum á borð við Ask the Slave. Þá hef ég komið fram með Sólstöfum og Sign. Gunnar er með raddaðan söng í blóðinu og tók þátt í uppsetningu á söngleik í menntaskóla. Hann spilar á baríton gítar, millistig klassísks gítars og bassa, sem gefur bandinu sérstakan hljóm. Daníel er svo gítarleikari af lífi og sál. Við tveir sameinumst í sameiginlegri aðdáun á poppböndum sem nýta raddaðan söng eins og Simon & Garfunkel og Bítlunum. Þetta er frjótt samstarf og hefur líklega aldrei verið frjórra en núna eftir þennan blessaða faraldur,“ segir Ragnar.

Hvað er það sem veitir ykkur innblástur?

„Það er klárlega eyjan okkar sem fyllir okkur innblæstri. Á fyrstu plötunni okkar sáum við að öll lögin okkar fjölluðu sjálfkrafa um árstíðirnar á Íslandi, veðrið, birtuna, myrkrið og fleira. Þannig kom nafnið á sveitinni.“

Íslenski sálmurinn sem kom hljómsveitinni á kortið

Árstíðir fékk gífurlega athygli víða um heim þegar myndband af þeim að syngja íslenskan sálm á lestarstöð fór eins og eldur í sinu á YouTube. „Frá því 2011 höfum við aðallega einbeitt okkur að því að spila og túra erlendis og er stærsti aðdáendahópurinn okkar frá Þýskalandi. Árið 2013, þegar við vorum á tónleikaferðalagi í Þýskalandi, enduðum við á að syngja sálminn Heyr himna smiður á lestarstöð í Wuppertal. Myndbandið af þessum gjörningi okkar fór út um allan heim og í kjölfarið opnuðust margar dyr fyrir okkur í tónlistarbransanum.“ Síðan þá hefur þetta aldagamla íslenska lag ferðast víða og birst í ýmsum sjónvarpsseríum og fleiru. „Það er heiður fyrir okkur að kynna íslenska menningu fyrir heiminum á þennan hátt, þó svo lagið hafi lítið með okkar tónlist að gera, annað en að vera raddaður flutningur.“

Ragnar viðurkennir að þeir séu allir komnir með smá leiða á sálminum enda hefur himnasmiðurinn fylgt þeim lengi. „Það er þó þannig að ef við erum í fallegum kirkjum með góðan hljómburð, þá skiptir ekki lengur máli hversu oft maður er búinn að syngja Heyr himna smiður, hann á alltaf við.“

Strákarnir í stúdíóinu. Fréttablaðið/Eyþór

Það er óvanalegt í popptónlistarheiminum að sjá þrjá stráka syngja svona vært og opna hjörtu sín upp á gátt.

Opna hjörtun upp á gátt

„Raddaður söngurinn sameinar okkur þrjá og við hikum aldrei við að sýna brothættu hliðina á okkur sjálfum. Líklega er það ástæða þess að annað hvort elskar fólk okkur eða þolir okkur ekki. Það er óvanalegt í popptónlistarheiminum að sjá þrjá stráka syngja svona vært og opna hjörtu sín upp á gátt.

Við höfum aldrei reynt að vera kúl á sviðinu. Tilfinningin ræður í tónlistinni og tengir okkur við aðdáendur okkar. Við erum engir kórdrengir, eiginlega langt frá því, en við getum vel sungið eins og kórdrengir. Maður myndi halda að hljómsveit þar sem þrír drengir opna hjarta sitt í rödduðum söng, myndi helst höfða til kvenna, en tölfræðin segir okkur að fleiri karlar hlusta á okkur en konur. Meðalaðdáandi Árstíða er enda 34 ára karlmaður sem býr í Dortmund eða San Diego,“ segir Ragnar og hlær. Hann bætir þó við að aðdáendahópurinn sé mjög fjölbreyttur og í Rússlandi sé hópurinn almennt yngri.

Vetur og sumar fæddust í faraldri

Hljómsveitin sat ekki auðum höndum í faraldrinum heldur samdi um 30 lög sem hún gefur út á tveimur plötum, Pendúl og Bliki. „Undanfarin ár höfum við verið duglegir að gefa út plötur og koma fram erlendis. Þegar faraldurinn skall á stöðvaðist allt og okkar helsta tekjulind hvarf. Á vissan hátt vorum við að semja okkur frá ástandinu. Við skilgreindum okkur sem fjölskyldu, enda unnið saman í rúmlega þrettán ár og orðnir eins og hálfgerðir bræður. Hljómsveitin og fjölskyldur okkar var faraldurskúlan okkar.

Við höfum setið á tónlistinni eins og ormar á gulli og núna þegar lítur út fyrir það ætli að létta á ástandinu, ætlum við að gefa efnið út og kveðja faraldurinn með stæl. Efnið sem við sömdum er af ýmsum toga, sumt er á íslensku, annað á ensku. Þetta skiptist líka þannig að íslensku lögin eru þyngri og dramatískari og ensku lögin bjartari og léttari. Því lá beint við að skipta efninu upp í tvær plötur: Pendúll inniheldur íslensk lög sem passa við vetrarmyrkrið og kemur út í nóvember. Blik kemur svo út í maí sem á vel við. Þetta eru eins og bróðir og systir.“

Upplifun okkar á tímanum brenglaðist og það fannst okkur áhugavert að vinna með.

Skynjun tímans var þeim hugleikin

Næstu mánuðir fara í að klára að vinna Blik og halda áfram að þróa konseptið á bak við plöturnar. „Við byrjuðum á því að þróa konseptveröldina með aðdáendum okkar í samstarfi við hinn kynngimagnaða fjöllistamann Pieter Hoekstra. Heildarhugmyndin er um það hvernig fólk skynjar tíma. Þegar við vorum að semja í faraldrinum voru allir dagar svo lengi að líða. Samt leið tímabilið ótrúlega hratt. Upplifun okkar á tímanum brenglaðist og það fannst okkur áhugavert að vinna með. Við báðum aðdáendur okkar að deila með okkur tímahugleiðingum sínum. Þá höfum við soðið okkar eigin pælingar og aðdáenda okkar niður í veigamikið konsept sem birtist í umslagaverkunum sem fylgja plötunum tveimur. Pendúll vísar svo auðvitað í tíma, sem og nafnið Blik, samanber augnablik. Svo hafa báðir titlarnir auðvitað mun fleiri skírskotanir.“

Markmiðið náðist á fjórum dögum

„Okkar tekjur koma mestmegnis úr því að túra en það var auðvitað ekki möguleiki í faraldrinum. Við stofnuðum því til hópsöfnunar fyrir mánuði síðan til að koma plötunum tveimur út. Það kom okkur skemmtilega á óvart að ná markmiðinu á fjórum dögum. Í dag erum við búnir að skjóta langt yfir markið sem við settum okkur og höfum því sett okkur aukamarkmið. Að taka upp enn aðra plötu með rödduðum lögum á borð við Heyr himna smið og fleiru. Okkur hefur lengi langað til að gera þetta og aðdáendur okkar hafa beðið um þetta lengi. Núna höfum við tækifæri til þess.

Svona hópsöfnun er mjög góð leið til að fjármagna plötuútgáfu, sérstaklega í kjölfar samkomutakmarkana. Tónlistarmenn eru orðnir sligaðir eftir faraldursástandið, enda er erfitt fyrir móralinn og egóið að fá ekki að spila fyrir lifandi áhorfendur. Með þessu fáum við smá búst og vitum að við eigum enn þá erindi við hlustendur okkar.

Svo er planið að fara í tveggja vikna tónleikaferðalag um Evrópu í desember að fylgja Pendúl eftir. Þetta verður okkar fyrsta tónleikaferðalag síðan 2019, en vissulega spiluðum við á nokkrum erlendum festivölum í sumar.“ Hópsöfnuninni lauk 1. nóvember en það verður enn hægt að kaupa plöturnar sjálfar í forsölu á vefsíðunni. Svo spilum við í Fríkirkjunni 30. desember eins og hefð er fyrir hjá okkur,“ segir Ragnar að lokum.