Hér komin uppskrift af ómótstæðilega ljúffengum páskaís sem á eftir að slá í gegn í páskaboðinu. Páskaísinn kemur úr smiðju Berglindar Hreiðars sem heldur úti bloggsíðunnu Gotterí og gersemar. „Þessi ís er einn sá besti sem ég hef búið til.“ Það passar virkilega vel að hafa marengsinn og krönsí súkkulaðiegg í hverjum bita,“ segir Berglind og er hin ánægðasta með útkomuna.

Paskais-3.jpeg

Páskaís

Ís

5 egg (aðskilin)

100 g púðursykur

3 tsk. vanillusykur

2 msk. Cadbury bökunarkakó

400 ml þeyttur rjómi

240 g Cadbury Mini eggs (3 pokar)

1 brúnn marengsbotn (keyptur tilbúinn)

Takið til smelluform sem er um 22-24 cm í þvermál. Setjið bökunarpappír í botninn og innan á hliðarnar (einnig hægt að nota kökuplast á hliðarnar ef þið eigið slíkt). Fínt að klippa bökunarpappír í langa ræmu sem hægt er að leggja slétta allan hringinn innan á formið (hægt að líma með límbandi til að festa betur). Saxið Cadbury Mini eggin gróft niður, geymið. Bútið marengsbotninn niður í munnstóra bita. Hægt er að kaupa tilbúinm marengsbotn til dæmis í Bónus til þess að einfalda lífið en auðvitað gætuð þið notað botn sem þið bakið. Þeytið rjómann og geymið í skál. Þeytið eggjahvíturnar og geymið í skál.

Þeytið eggjarauður og púðursykur saman þar til létt og ljóst, bætið þá vanillusykri og bökunarkakó saman við og blandið vel saman. Vefjið næst þeytta rjómanum varlega saman við eggjarauðublönduna með sleikju. Næst má gera það sama við stífþeyttu eggjahvíturnar, vefja þær saman við blönduna með sleikju. Að lokum má taka um helminginn af marengsbitunum og Mini eggjunum og hræra saman við með sleikju og hella blöndunni í smelluformið. Restin af marensbitunum og eggjunum fer síðan ofan á ísinn áður en hann fer í frysti. Frystið ísinn í að minnsta kosti 4 klukkustundir eða yfir nótt og njótið síðan með heitri íssósu.

Heit íssósa

200 g gróft saxað Toblerone

100 ml rjómi

Bræðið saman í potti þar til slétt og þykk íssósa hefur myndast. Leyfið hitanum aðeins að rjúka úr áður en þið notið sósuna.

*Allt hráefnið í ísinn fæst í Bónus.

Paskais-4.jpeg