Fimm pálmatré sem staðið hafa í Smáralind um árabil eru nú komin á sölu. Hugi Hreiðarsson framkvæmdastjóri Efnisveitunnar sem sér um söluna auglýsti trén til sölu í morgun og segist þegar hafa fengið mikil viðbrögð.
„Þetta er í fyrsta og líklega eina skiptið sem við erum að selja suðræna stemningu,“ segir Hugi léttur í bragði í samtali við Fréttablaðið. Trén eru um sex til sjö metra há og eru þrjú þeirra í upprunalegum lit en tvö hafa verið máluð svört. Uppsett verð er 150 þúsund krónur án vasks en 186 þúsund krónur með vaski.
„Við vinnum fyrir fullt af framsæknum fyrirtækjum sem hugsa fyrst og fremst um hag jarðarinnar, þessi góðu tré hafa sómt sér vel í Smáralind en bíða þess nú að komast á nýja staði,“ segir Hugi.
Bíður eftir símtali frá Degi
„Það hafa nokkrir nú þegar merkt Reykjavíkurborg við auglýsinguna hjá okkur. Við bara auglýsum eftir símtali frá Reykjavíkurborg um að koma að skoða, þarna er lausnin komin, Dagur hlýtur að hringja,“ segir Hugi hlæjandi og vísar þar til fyrirhugaðra framkvæmda í Vogahverfi þar sem hugmyndir eru uppi um að koma fyrir tveimur pálmatrjám.
Trén eru ekki lifandi. „Og það hlýtur að steinliggja. Það er ekkert að því þó það þurfi ekki að vökva þau, við erum fyrst og fremst að fá þessa suðrænu stemningu sem ég held að arkitektarnir hafi verið að leita að þegar þeir teiknuðu þetta inn á lóðina. Maður sér þetta víð erlendis að stundum er notast við svona mannanna verk.“
Hugi segir trén líta mjög vel út. „Þetta er vel smíðað og þetta getur sómt sér vel bæði bara þar sem er hátt til lofts, á veitingahúsum eða hjá bæjarfélögum eða í íþróttamiðstöðvum.“
