Myndbandið við lagið Fear Flows var frumsýnt í gær, en lagið er önnur smáskífan af væntanlegri þröngskífu (EP-plötu) sem Daníel og hljómsveit hans tóku upp síðastliðið sumar. „Platan inniheldur fjögur lög sem samin eru af mér, auk þess sem hljómsveit mín, þeir Hálfdán Árnason, Pétur Hallgrímsson og Skúli Gíslason, leggja sitt af mörkum. Garðar Borgþórsson hefur nú tekið við hlutverki Péturs í hljómsveitinni en platan var tekin upp í júlí og ágúst á þessu ári,“ segir Daníel, en fyrirhugaður útgáfudagur plötunnar er 20. nóvember næstkomandi.

Fyrsta smáskífan af plötunni, lagið Birds, kom út í byrjun árs en það var valið lag dagsins á KEXP-útvarpsstöðinni í Seattle 5. maí síðastliðinn. „Það eru þrjú ný lög og brothættari útgáfa af Birds á plötunni, en Red Limo kvartettinn spilaði einmitt með mér í því lagi en þeir hafa líka unnið mikið með Lanegan og Eddie Vedder líka.“

Daníel ásamt hljómsveitarmeðlimum sínum en það styttist í að fyrsta platan þeirra komi út. MYND/GUSTAVOBLANCO

Umkringdir goðsögnum

Óhætt er að fullyrða að Daníel og hljómsveit hans séu í góðum félagsskap á plötunni, því auk kvartettsins sér tónlistargoðsögnin Alain Johannes, sem hefur meðal annars unnið með Mark Lanegan, Chris Cornell, PJ Harvey og Queens of the Stone Age, um að hljómjafna plötuna og Belgarnir Aldo Struyf og Fred Lyenn úr Mark Lanegan Band eru sérstakir gestir á plötunni. Jóhannes Birgir Pálmason sá um upptökur, hljóðblöndun og klippingu.

Daníel býr yfir mikilli reynslu sem tónleikahaldari en það var þannig sem hann komst í kynni við Mark Lanegan. „Ég flutti hann inn 2013 til að spila í Fríkirkjunni og þá myndaðist ákveðinn vinskapur. Þeir höfðu orð á því, fylgdarliðið og bandið hans, að þeir hefðu aldrei áður séð hann tengjast tónleikahaldara eins og hann tengdist mér. Hann faðmaði mig og þakkaði mér fyrir uppi á sviði og þeir sögðust aldrei hafa séð hann í þessum fíling áður. Ég fór svo með hann í Kringluna og við keyptum á hann strigaskó, kíktum á jólasveinana spila á gítar og fengum okkur kaffi.“

Eftir það byrjaði boltinn að rúlla. „Svo út frá því fóru hljómsveitarmeðlimir hans að koma í heimsókn til mín, eins og Fred sem spilar í tveimur lögum á plötunni, og ég hef líka farið út og hitt þá. Það var svo í desember á síðasta ári sem ég fór að hitta þá í Camden á tónleikum þar, og kynntist þá nokkrum sem höfðu ekki verið með á Íslandi og líka tour manager-num hans, sem er núna umboðsmaðurinn minn. Þá náði ég aðeins að spjalla við Mark aftur og þá kom upp þessi pæling um að strákarnir myndu kannski spila á plötunni hjá mér.“

Daníel komst í kynni við Mark Lanegan árið 2013. MYND/GUSTAVOBLANCO

Ljósaskipti lífsins

Daníel lýsir andrúmslofti plötunnar sem þungbúnu en tilraunakenndu. „Platan er dálítið heavy og dílar mikið við innri baráttu við þunglyndi, kvíða, ótta og óvissu og allt þetta sem er í gangi í dag. Þetta er engin partíplata og kannski ekkert allra að hlusta á,“ segir Daníel og skellir upp úr.

„Við erum að blanda saman klassík og elektróník, pínu ballöðufílingi og rokki. Lagið sem kom út í síðustu viku er svona rokkaðasta lagið á plötunni, frekar „straight forward“ rokklag á meðan hin lögin eru kannski tilraunakenndari og tilfinninganæmari,“ útskýrir hann.

„Þetta er tónlist fyrir haustið og veturinn, það er svolítið skammdegi í þessu. Við eigum eftir að birta plötuumslagið en það gefur betri innsýn í andrúmsloftið. Þetta er dáítið að leita að ljósinu í myrkrinu, samspil ljóss og myrkurs, eins konar ljósaskipti lífsins.“

Daníel hefur í nógu öðru að snúast, en hann býr um þessar mundir á Fáskrúðsfirði og kennir í grunnskólanum á Reyðarfirði. „Ég flutti hingað í sumar, kærastan mín býr hérna með syni sínum og ég ákvað að það væri ágætt að prófa eitthvað nýtt. Þetta er líka töluvert skemmtilegri staður fyrir fjögurra ára gutta heldur en Skólavörðuholtið,“ segir hann og hlær. „En ég sakna samt miðbæjarins á hverjum degi.“