Linda Ben, köku- og matarbloggari, höfundur uppskriftabókar og sælkeri, bakar bollur og heldur í hefðirnar sem fylgja bolludeginum með fjölskyldu sinni.

„Við erum alltaf með bollukaffi á sunnudeginum og svo fiskibollur eða kjötbollur í kvöldmatinn á mánudeginum.“

Linda á góðar minningar í tengslum við bolludaginn og hefur speglað þær til barnanna sinna.

„Ég elskaði bolludaginn sem barn, hjálpaði mömmu að baka bollurnar og við föndruðum bolluvönd saman. Vatnsdeigsbollur eru í uppáhaldi hjá mér og hafa ávallt verið.“

Linda ljóstrar hér upp uppskriftum af sínum uppáhaldsbollum og fyllingum sem eiga hug hennar þessa dagana.

Hindberja- bolludagsbollur með vanillukremsrjóma

Vatnsdeigsbollur

Hindberjasulta

Vanillukrem

300 ml rjómi frá Örnu mjólkurvörum

400 g hindber

Flórsykur

Aðferð

Byrjið á því að útbúa vanillukremið, sjá uppskrift hér fyrir neðan. Gerið næst vatnsdeigsbollur, sjá uppskrift hér fyrir neðan. Þeytið rjómann og blandið honum saman við vanillukremið. Opnið vatnsdeigsbollurnar, setjið hindberjasultu í botninn, vanillukremsrjómann yfir og loks hindber. Lokið og sigtið flórsykri yfir.

Vatnsdeigsbollur

125 g smjör

1 msk. sykur

275 ml vatn

170 g hveiti

1 tsk. lyftiduft

½ tsk. salt

3-4 stk. egg

Aðferð

Kveiktu á ofninum og stilltu á 180 °C hita og blástur. Smjör, sykur og vatn er sett í pott og soðið saman í 2-3 mínútur. Slökktu svo undir pottinum. Hveiti, lyftiduft og salt er sett í skál, bættu því út í smjör-vatnið og hrærðu vel saman með sleif. Deigið á að vera þétt og lyftast upp frá brúnum pottsins. Láttu standa í 5 mínútur. Færðu deigið í hrærivél. Settu þrjú egg út í deigið, eitt og eitt í einu, og hrærðu þau vel saman við deigið. Vegna þess að egg eru misstór er mismunandi hversu mikið þú þarft af síðasta egginu. Áferðin á deiginu á að vera þannig að deigið lekur hægt og svolítið erfiðlega af sleifinni á nokkrum sekúndum. Deigið á að halda nokkurn veginn sömu lögun eftir að þú setur það á plötuna en ekki leka út og verða flatt. Settu síðasta eggið í litla skál og hrærðu það saman. Settu 1 matskeið af egginu í einu út í og hrærðu vel á milli þangað til þú ert komin/n með rétta áferð á deigið.Settu smjörpappír á ofnplötu og settu deigið í sprautupoka eða matskeiðar til að útbúa bollurnar (2 matskeiðar ein bolla). Hafðu gott pláss á milli bollanna því þær stækka mikið í ofninum, gott að miða við um það bil 12 bollur á hverja plötu. Bollurnar eru bakaðar í 20–25 mínútur, en ekki opna ofninn fyrr en allavega 20 mínútur eru liðnar. Þá er hægt að taka eina út og meta hversu margar mínútur bollurnar eiga eftir, en þú sérð það þegar þú opnar bolluna og sérð hversu blaut hún er inni í.

Margir taka forskot á sæluna og bjóða upp á bollukaffi um helgina.

Vanillukrem

500 ml nýmjólk frá Örnu mjólkurvörum

Fræin úr 1 vanillustöng

1 egg

1 eggjarauða

100 g sykur

30 g kornsterkja/maizena mjöl

25 g smjör

½ tsk. salt

Byrjið á að útbúa pastry cream með því að setja mjólkina í pott ásamt vanillufræjunum í pott og hita hana að suðu en slökkvið um leið undir þegar byrjar að sjóða. Setjið egg, eggjarauðu, kornsterkju og sykur í skál og hrærið saman. Hellið 1/3 af heitu mjólkinni út í skálina með hrærivélina í gangi. Þegar allt hefur blandast saman, hellið þá eggjablöndunni aftur ofan í pottinn með restinni af mjólkinni. Kveikið aftur á hitanum undir pottinum og hrærið stanslaust í blöndunni þar til hún hefur þykknað mikið og aðeins breytt um lit. Slökkvið þá undir pottinum og hrærið smjörið og saltið saman við. Hellið blöndunni í eldfast mót sem passar í ísskáp og leggið plastfilmu yfir, kælið.

Geggjaðar karamellubollur.

Karamellu- kropps-bolludagsbollur

Vatnsdeigsbollur

500 ml rjómi

150 g Nóa rjómakúlur

50 ml rjómi

2 dl flórsykur

150 g Siríus karamellukurl

Aðferð

Setjið rjómakúlurnar í pott og bræðið með 50 ml rjóma, leyfið því að kólna örlítið. Léttþeytið rjómann og bætið út í 2 matskeiðum af karamellunni, fullþeytið rjómann. Bætið 100 g af karamellukurli ofan í rjómann, blandið varlega saman. Skerið bollurnar í helminga og fyllið þær með rjómanum, lokið bollunum. Setjið flórsykur ofan í karamelluna og blandið saman. Setjið karamelluna ofan á bollurnar og skreytið með karamellukurli.

Gaman er að bera bollurnar fram á fallegum kökudiskum og/eða brettum sem gleðja augað.