Nýju þættirnir, sem eru tíu talsins, hefjast árið 1964 og sýna þrettán ár í lífi drottningar. Það gengur ýmislegt á í Bretlandi á þessum árum þegar breska hagkerfið staðnaði og unglingahreyfingar hófu mótmæli með tilheyrandi hippatísku og bítlamúsík. Í framhaldinu kom upp umræða um opinberan kostnað af konungsfjölskyldunni. Elísabet drottning gaf ekki kost á sér í viðtöl við þess konar spurningum og hélt sig mikið í Windsor.

Það þykir sterkt útspil hjá Netflix að skipta út leikkonum fyrir þriðju þáttaröðina og ráða jafn öflugan karakter og Oliviu Colman sem er margverðlaunuð. Í fyrri þáttaröðum var það leikkonan Claire Foy sem fór með hluaverk drottningar sem þá var ung og brothætt. Í þessum þáttum hefur hún komið sér upp sterkari skel og Olivia Colman þykir minna mikið á Elísabetu í útliti.

Olivia Colman þykir venjuleg kona og hefur ekki látið frægðina breyta lífi sínu. Hún er fjölskyldukona sem býr í ósköp venjulegri götu í London.

Olivia fékk Óskarsverðlaun fyrir leik sinn í kvikmyndinni The Favourite á árinu en í kvikmyndinni leikur hún Önnu drottningu Englands. Fyrir nokkrum dögum var Olivia heiðruð með CBE-orðu í Buckingham-höll af Önnu prinsessu fyrir glæstan leikferil. Sumum þykir merkilegt að hún skuli heiðruð stuttu fyrir frumsýningu The Crown og sömuleiðis að drottningin sjálf hafi ekki verið viðstödd þegar hún var heiðruð.

Olivia hefur leikið í miklum fjölda sjónvarpsþátta og kvikmynda á undanförnum árum. Eftir að hún vann Óskarsverðlaun hefur umboðsmaður hennar ekki við að taka á móti tilboðum til hennar um leik í hinum og þessum kvikmyndum. Olivia er 45 ára en sagt er að ferill hennar hafi farið á flug eftir fertugt sem er ánægjulegt þar sem oft er talað um æskudýrkun í heimi kvikmyndanna.

Olivia tók við Óskarsverðlaunum í febrúar fyrir hlutverk sitt í kvikmyndinni The Favourite.

Í samtali við tímaritið Vogue segir Olivia, sem er gift og þriggja barna móðir, að það henti henni betur núna að hafa svona mikið að gera heldur en þegar hún var yngri. „Það er skrítið að eldri leikkonur sem hafa öðlast styrk og þroska eru ekki jafn vinsælar og þær yngri, reyndar fáránlegt,“ segir hún í viðtali við blaðið. Olivia var forsíðustúlka Vogue í október. Venjan er samt sú að blaðið velji frekar ungar, nýjar stjörnur á forsíðuna. Olivia er sönnun þess að konur á miðjum aldri eru gæddar miklum hæfileikum og þroska til að árangri í starfi. Þessar konur eru áminning til komandi kynslóða kvenna um að það er hægt að ná langt með því að vera maður sjálfur. Olivia er algjör snillingur í öllu sem hún tekur sér fyrir hendur. Hún þykir ósköp venjuleg kona sem hefur búið sér og fjölskyldu sinni notalegt heimili með fallegum garði í suðurhluta Lundúna. Hún nýtur fjölskyldulífsins og var að undirbúa grillveislu þegar blaðamaður Vogue hitti hana. Eiginmaður hennar er Ed Sinclair en þau giftu sig 2001.

Úr þáttunum The Crown. Leikkonan klæðist líkt og drottningin í þáttunum.

Þótt Olivia sé oftast núna í dramatískum hlutverkum byrjaði hún ferilinn á gamanleikritum og -þáttum. Má þarf nefna Peep Show, Green Wing, That Mitchell and Webb Look og fleiri. Hún fékk bresku sjónvarpsverðlaunin sem besta kvengamanleikkonan. Síðan hefur hún hlotið margvísleg verðlaun, meðal annars Golden Globe, Emmy og Óskar.